L-OiRA ġiet stabbilita biex tipprovdi għodod faċli biex tużahom li jiggwidaw lil organizzazzjonijiet żgħar u mikro tul il-process tal-valutazzjoni tar-riskju. Is-software tal-OiRA żviluppat mill-EU-OSHA fl-2009, u li ilu jintuża sa mill-2010, huwa bbażat fuq għodda Olandiża għall-valutazzjoni tar-riskju magħrufa bħala RI&E, li tat prova li kienet ta’ suċċess kbir u użata ħafna. 

Is-software tal-OiRA tal-EU-OSHA jgħin lis-sħab soċjali settorjali (organizzazzjonijiet tal-impjegaturi u tal-impjegati) u lill-Awtoritajiet nazzjonali (ministeri, spettorati tax-xogħol, istituti tal-OSH, eċċ.) biex jipproduċu għodod tal-valutazzjoni tar-riskju speċifiċi għas-settur li jkunu mmirati lejn negozji żgħar.

Ara s-sit web tal-proġett tal-OiRA għal informazzjoni aġġornata dwar il-proġett tal-OiRA (is-sħab tal-OiRA, l-għodod tal-OiRA ppubblikati jew li qed jiġu ppubblikati).

Il-valutazzjoni tar-riskju hija l-bażi ta’ kwalunkwe approċċ għall-ġestjoni tas-sikurezza u tas-saħħa u hija essenzjali fl-istabbiliment ta’ post tax-xogħol b’saħħtu. 

Permezz tal-OiRA, l-EU-OSHA tappoġġa l-Qafas Strateġiku tal-UE dwar is-Saħħa u s-Sikurezza Okkupazzjonali 2021–2027, imniedi f’Ġunju 2021. Billi jiffaċilita l-valutazzjoni tar-riskju, l-OiRA timmira li żżid in-numru ta’ kumpaniji mikro u żgħar li jivvalutaw ir-riskji tagħhom u l-kwalità tal-valutazzjonijiet tar-riskju tagħhom. L-għodod jippermettu lill-kumpaniji jibdew (jew itejbu) il-proċess tal-valutazzjoni tar-riskju. B’dan il-mod l-għodod tal-OiRA jistgħu jgħinu lill-kumpaniji jsiru aktar kompetittivi, pereżempju billi jnaqqsu l-ispejjeż li huma r-riżultat ta’ mard okkupazzjonali u billi jimminimizzaw ir-riskji tal-aċċidenti, kif ukoll itejbu l-kundizzjonijiet tax-xogħol globali u l-prestazzjoni organizzazzjonali.

Illum il-valutazzjoni tar-riskju hi proċess familjari għal ħafna organizzazzjonijiet, użata f’mijiet ta’ eluf ta’ postijiet tax-xogħol madwar l-Ewropa biex tipprevjeni r-riskji. Iżda għal xi kumpaniji, partikolarment organizzazzjonijiet żgħar u mikro, il-valutazzjoni tar-riskju tista’ tkun proċess li joffri sfida. L-OiRA jista’ jagħmel dan il-proċess iktar faċli, billi jipprovdi lill-organizzazzjonijiet bir-riżorsi li jeħtieġu biex jegħlbu din l-isfida.

Billi jużaw l-għodod tal-OiRA, l-organizzazzjonijiet ikunu qed jieħdu wkoll vantaġġ minn ċerti aspetti:

• L-użu tal-għodod tal-OiRA hu totalment bla ħlas
• L-għodod huma disponibbli online
• Hemm applikazzjoni mobbli disponibbli
• L-għodod huma mmirati għas-settur
• L-għodod jistgħu jinbidlu skont il-kundizzjonijiet tal-kumpaniji sa ċertu punt
• L-għodod jagħtu l-possibilità li jiġi żviluppat pjan ta’ azzjoni u li jagħżlu minn lista ta’ miżuri proposti

Hemm ħames passi ewlenin fil-proċess tal-OiRA:

1. Preparazzjoni: sa ċertu punt l-OiRA tippermetti lill-kumpaniji jfasslu l-valutazzjonijiet tar-riskju għall-ispeċifiċitajiet tagħhom stess billi jwieġbu ftit mistoqsijiet sempliċi
2. Identifikazzjoni: dan jinvolvi t-tiftix ta’ dawk l-affarijiet fuq il-post tax-xogħol li għandhom il-potenzjal li jikkawżaw ħsara, u l-identifikazzjoni ta’ min jista’ jkun espost għall-periklu
3. Evalwazzjoni: din il-fażi tikkonsisti fil-prijoritizzazzjoni tar-riskji li ġew identifikati. Il-prijoritizzazzjoni aktar tard tgħin biex jiġi deċiż liema miżuri għandhom jiġu implimentati l-ewwel
4. Pjan ta’ azzjoni: l-għodda mbagħad se tgħin biex jiġi ġġenerat pjan ta’ azzjoni u biex jiġi deċiż kif jiġu eliminati jew ikkontrollati r-riskji
5. Rapport: fl-aħħar nett, jiġu ġġenerati awtomatikament rapport u pjan ta’ azzjoni li jistgħu jiġu stampati u/jew iddawnlowdjati, li jippermettu d-dokumentazzjoni tar-riżultati tal-proċess tal-valutazzjoni tar-riskju

Kull m’hemm bżonn biex tirreġistra hu indirizz elettroniku validu. Kull individwu jew organizzazzjoni jistgħu jagħżlu l-aktar għodda li taqbel l-aħjar mal-pajjiż, is-settur u l-kumpanija tagħhom mill-għodod tal-OiRA disponibbli. 

Żur l-għodod disponibbli tal-OiRA għal kull settur u għal kull pajjiż fuq is-sit web tal-proġett OiRA.

L-għodod tal-OiRA kollha nħolqu minn jew bl-involviment tas-sħab soċjali u/jew l-awtoritajiet nazzjonali. Jekk int sieħeb soċjali jew istitut/awtorità nazzjonali u trid tkun involut u tiżviluppa waħda jew iktar mill-għodod settorjali tal-OiRA, tista’ ssib aktar informazzjoni hawnhekk fuq is-sit web tal-proġett tal-OiRA.

Ħafna organizzazzjonijiet jaqblu fid-definizzjoni tagħhom tan-nanomaterjali dwar il-fatt li huma materjali li fihom partikuli b'dimensjoni esterna waħda jew aktar bejn 1-100 nanomaterjali (nm). Aqra d-definizzjoni tan-nanomaterjali tal-Kummissjoni Ewropea.

In-nanomaterjali, li huma sa 10 000 darba iżgħar minn xagħra ta' bniedem, għandhom daqs komparabbli ma' atomi jew molekoli u jieħdu l-isem tagħhom mill-istruttura żgħira tagħhom (nanometru huwa 10-9 ta' metru). Mhux biss minħabba d-daqs tagħhom iżda anki minħabba l-karatteristiċi fiżiċi jew kimiċi tagħhom li jinkludu, fost affarijiet oħra, l-għamla u l-erja tas-superfiċje tagħhom, in-nanomaterjali huma differenti fil-proprjetajiet tagħhom mill-istes materjali fuq skala akbar. 

Minħabba dawn id-differenzi, in-nanomaterjali joffru opportunitajiet ġodda u eċċitanti f'oqsma bħall-inġinerija, l-informazzjoni u t-teknoloġija tal-komunikazzjoni, il-mediċina u l-farmaċewtiċi, biex insemmu xi ftit. Madankollu, dawn l-istess karatteristiċi li jagħtu l-proprjetajiet uniċi tagħhom għan-nanomaterjali huma responsabbli wkoll mill-effetti li jħallu fuq saħħet il-bniedem u l-ambjent. 

Pereżempju, in-nanomaterjali huma preżenti b'mod naturali fl-emissjonijiet tal-vulkani, jew jistgħu jkunu prodotti sekondarji tal-attvitajiet tal-bniedem bħad-dħaħen tad-dijżil jew id-duħħan tat-tabakk.  Iżda ta' interess partikolari huma n-nanomaterjali mmanifatturati. Dawn diġà jinstabu f'firxa wiesgħa ħafna ta' prodotti u applikazzjonijiet.

Xi wħud minn dawn in-nanomaterjali ilhom jintużaw għal għexieren ta' snin bħal pereżempju s-silika amorfa sintetika fil-konkrit, it-tajers u l-prodotti alimentari. Oħrajn ġew skoperti biss aktar reċetement, bħad-dijossidu tan-nano-titanju bħala aġent tal-imblukkar tal-UV fiż-żebgħa jew il-prodotti għall-protezzjoni kontra x-xemx; nano-fidda bħala anti-mikrobjali fl-applikazzjonijiet mediċi u tat-tessuti, jew in-nanotubi ta-karbonju, li jintużaw b'mod wiesa' għas-saħħa mekkanika, il-piż ħafif, il-proprjetajiet ta' dissipazzjoni tas-sħana u l-konduttività elettrika tagħhom f'applikazzjonijiet bħall-prodotti elettroniċi, il-ħażna tal-enerġija, il-vetturi tal-ispazju u l-istrutturi tal-vetturi u t-tagħmir tal-isports. Il-ġenerazzjonijiet il-ġodda ta' nanomaterjali qegħdin jiġu żviluppati b'mod rapidu u s-suq tagħhom huwa mistenni li jikber.

Hemm tħassib serju fir-rigward tal-effetti fuq is-saħħa tan-nanomaterjali. Il-Kumitat Xjentifiku dwar ir-Riskji Emerġenti għas-Saħħa u dawk Identifikati Reċentement (SCENIHR) sab li kien hemm perikoli ppruvati għas-saħħa assoċjati ma' numru ta' nanomaterjali mmanifatturati. Madankollu, mhux il-materjali kollha neċessarjament għandhom effett tossiku, u huwa meħtieġ approċċ każ b'każ filwaqt li tkompli għaddejja r-riċerka.

L-effetti l-aktar importanti tan-nanomaterjali nstabu fil-pulmuni u fost l-oħrajn jinkludu infjammazzjoni u ħsara fit-tessut, fibrożi u ġenerazzjoni ta' tumuri. Is-sistema kardjovaskulari tista' tiġi affettwata wkoll. Xi tipi ta' nanotubi tal-karbonju jistgħu jwasslu għal effetti bħal tal-asbestos. Minbarra l-pulmuni, in-nanomaterjali nstabu li jilħqu organi u tessuti oħra inkluż il-fwied, il-kliewi, il-qalb, il-moħħ, l-iskeletru u t-tessuti rotob.

Bħala riżultat tad-daqs żgħir u l-erja kbira tagħhom, in-nanomaterjali partikulati f'forma ta' trab jistgħu jippreżentaw riskju ta' splużjoni, filwaqt li l-materjali mhux raffinati rispettivi tagħhom jaf le.

Aqra r-reviżjoni tal-Kummissjoni Ewropea dwar it-Tipi u l-użi tan-nanomaterjali, inkluż l-aspetti tas-sigurtà, u l-analiżi tar-riċensjoni tal-EU-OSHA l-“Espożizzjoni għan-nanomaterjali fuq il-post tax-xogħol”

Il-ħaddiema jistgħu jiġu f'kuntatt man-nanomaterjali fl-istadju ta' produzzjoni. Iżda ħafna aktar ħaddiema jistgħu jkunu esposti għan-nanomaterjali fi stadji differenti tal-katina tal-provvista, fejn il-ħaddiema jaf lanqas biss ikunu jafu li jkunu f'kuntatt man-nanomaterjali. Għaldaqstant huwa improbabbli li qegħdin jiġu implimentati miżuri suffiċjenti li jevitaw l-esponiment. Aqra l-analiżi tar-riċensjoni dwar il-perċezzjoni tar-riskji u komunikazzjoni tar-riskji fir-rigward tan-nanomaterjali fuq il-post tax-xogħol.

Għalhekk l-esponiment jista' jiġri biss f'varjetà ta' ambjenti ta' postijiet tax-xogħol fejn jiġu użati, immaniġġjati jew ipproċessati n-nanomaterjali u għaldaqstant jidħlu fl-arja u jittieħdu man-nifs, jew jiġu f'kuntatt mal-ġilda; pereżempju fil-kuntesti li jvarjaw mill-kura tas-saħħa jew ix-xogħol fil-laboratorju, sal-manutenzjoni jew ix-xogħol ta' kostruzzjoni.

Sir af aktar dwar l-espożizzjoni għan-nanomaterjali fuq il-post tax-xogħol

Il-leġiżlazzjoni tal-UE dwar il-protezzjoni tal-ħaddiema tapplika għan-nanomaterjali, minkejja li ma tirreferix b'mod espliċitu għal dawn il-materjali.  Ta' rilevanza partikolari huma d-Direttiva Qafas 89/391/KEE, id-Direttiva dwar l-Aġenti kimiċi 98/24/KE, u d-Direttiva dwar il-Karċinoġeni u l-Mutaġeniċi 2004/37/KE, kif ukoll il-leġiżlazzjoni dwar is-sustanzi kimiċi(REACH u CLP). Dan ifisser li l-impjegaturi huma mitluba jivvalutaw u jimmaniġġjaw ir-riskji tan-nanomaterjali fuq ix-xogħol. Jekk l-użu u l-ġenerazzjoni tan-nanomaterjali ma jistgħux jiġu eliminati jew sostitwiti minn materjali jew proċessi anqas perikolużi, l-esponiment tal-ħaddiema għandu jitnaqqas permezz ta' miżuri ta' prevenzjoni skont il-ġerarkija ta' kontroll billi tingħata prijorità lil:

1. miżuri ta' kontroll tekniku fis-sors;
2. miżuri organizzattivi;
3. tagħmir ta' protezzjoni personali, bħala l-aħħar soluzzjoni.

Għalkemm għad hemm ħafna inċertezzi, hemm tħassib serju dwar il-perikli għas-saħħa u s-sigurtà tan-nanomaterjali. Għalhekk, l-impjegaturi flimkien mal-ħaddiema għandhom japplikaw approċċ prekawzjonarju għall-ġestjoni tar-riskju fl-għażla tal-miżuri ta' prevenzjoni.

Jista' jkun diffiċli biex jiġu identifikati n-nanomatejali, is-sorsi ta' emissjoni u l-livell ta' espożizzjoni tagħhom; madankollu huma disponibbli linji gwida u għodod li jgħinu fil-ġestjoni tar-riskji tan-nanomaterjali fuq il-post tax-xogħol.

Aqra l-pariri aktar speċifiċi tal-EU-OSHA dwar kif għandhom jiġu mmaniġġjati n-nanomaterjali fis-settur tal-kura tas-saħħa, u fix-xogħol ta' manutenzjoni. Organizzazzjonijiet oħra ppruduċew ukoll materjal ta' informazzjoni utli ħafna, pereżempju dwar in-nanomaterjali fil-kostruzzjoni  u fl-għamara, jew fir-riċerka u l-iżvilupp.

Sir af kif kumpaniji oħra mmaniġġjaw in-nanomaterjali mill-Eżempji tagħna ta' prattika tajba ta' ġestjoni tan-nanomaterjali fuq il-post tax-xogħol

Għandna t-tendenza li nassoċjaw il-kelma 'ekoloġiku' mas-sigurtà - iżda dak li hu tajjeb għall-ambjent mhux neċessarjament tajjeb għas-saħħa u s-sigurtà tal-ħaddiema li għandhom impjieg ekoloġiku. F'ċerti każijiet, diġà rajna leġiżlazzjoni u teknoloġiji ġodda, imfassla biex iħarsu l-ambjent, u dan iwassal biex il-ħaddiema jitpoġġew f'riskju akbar. Pereżempju, it-tnaqqis tal-ammont ta' skart li jintbagħat fil-miżbliet, wassal għal rati ogħla ta' aċċidenti u mard fost il-ħaddiema li xogħolhom huwa li jipproċessawh.

It-teknoloġiji jew il-proċessi ta' xogħol il-ġodda assoċjati mal-impjiegi ekoloġiċi jistgħu jwasslu għal perikli ġodda, li jitolbu kombinazzjonijiet ġodda ta' ħiliet biex jindirizzawhom: l-għarfien dwar l-OSH il-"qadim" ma jistax jiġi sempliċement ittrasferit lilhom. Pereżempju l-installazzjoni ta' ħiter tal-ilma solari, tinvolvi l-kombinazzjoni tal-ħiliet ta' saqqaf, plamer u elettriċista.

Il-veloċità li biha hija mistennija li tikber l-ekonomija ekoloġika tista' twassal għal nuqqasijiet fil-ħiliet, b'ħaddiema mingħajr esperjenza li jiġu involuti fi proċessi li ma jkunux ġew imħarrġa għalihom u li għalhekk ipoġġu s-saħħa u s-sigurtà tagħhom f'periklu. Jista' jkun hemm ukoll polarizzazzjoni akbar tal-forza tax-xogħol lejn il-ħiliet, bil-ħaddiema b'ħiliet baxxi mġiegħla jaċċettaw kundizzjonijiet tax-xogħol aktar baxxi. L-aħħar iżda mhux l-anqas, il-pressjoni ekonomika u politika tista' twassal biex jiġi injorat it-tħassib relatat mal-OSH.

Sabiex l-impjiegi ekoloġiċi jkunu tassew sostenibbli, irridu nkunu ċerti li dawn sejrin iħallu benefiċċju għas-saħħa u s-sigurtà tal-ħaddiema, kif ukoll għall-ambjent. Fl-ekonomija ekoloġika, bħal f'oqsma oħra, OSH tajba għandha rwol essenzjali biex iżżid il-kompetittività u l-produttività. F'dan il-qasam li qiegħed jiżviluppa malajr, irridu nassiguraw li dak li hu tajjeb għall-ambjent ikun tajjeb għall-ħaddiema wkoll.

Fid-dawl ta' kemm l-ekonomija ekoloġika hija mistennija li tikber malajr, huwa importanti li aħna nantiċipaw kull riskju ġdid jew emerġenti relatat mal-OHS fir-rigward tal-impjiegi ekoloġiċi qabel ma dawn joħorġu. Din hija r-raġuni għala l-EU-OSHA wettqet studju ta' previżjoni ddettaljat, li jagħti ħarsa lejn kif ix-xogħol fl-impjiegi ekoloġiċi x'aktarx jiżviluppaw sal-2020, u xi sfidi futuri relatati mal-OSH dan jista' jġib miegħu. L-istudju identifika numru ta' xenarji futuri possibbli, fid-dawl tal-iżviluppi fit-teknoloġiji ekoloġiċi, taħt kundizzjonijiet ekonomiċi u soċjali differenti. L-għan huwa li tingħata attenzjoni għal riskji potenzjali relatati mal-OSH f'dan il-qasam, u li b'mod partikolari, dawk li jfasslu l-politika fuq il-livell tal-UE jingħataw għodod biex ikunu jistgħu jsawwru l-postijiet tax-xogħol tal-ġejjieni, u biex il-ħaddiema tal-Ewropa jinżammu sikuri u b'saħħithom.

Sir af aktar dwar:

Ir-rapport ta' previżjoni dwar l-OSH f'oqsma ekoloġiċi

Is-sommarju tar-rapport u x-xenarji

Il-kartuns li juru r-riskji ġodda u emerġenti relatati mal-OSH fix-xenarji

L-EU-OSHA investigat ukoll aktar fil-fond, il-kwistjonijiet tal-OSH assoċjati ma' oqsma teknoloġiċi ekoloġiċi partikolari enfasizzati fl-istudju ta' previżjoni, bħall-applikazzjonijiet tal-enerġija solari fuq skala żgħira, il-kostruzzjoni ekoloġika jew l-enerġija mir-riħ.

Sir af aktar:

• Fatt-E dwar l-OSH u l-applikazzjonijiet tal-enerġija solari fuq skala żgħira
• Fatt-E dwar l-OSH u l-bini ekoloġiku
• OSH u l-enerġija mir-riħ: aqra dinreport and the fatt-e sommarju

Huma disponibbli wkoll listi ta' verifika biex jiġu identifikati l-perikli potenzjali għas-saħħa u s-sigurtà tal-ħaddiema assoċjati ma' dawn it-teknoloġiji ekoloġiċi u biex jingħataw eżempji ta' miżuri preventivi. Dawn il-listi ta' verifika jistgħu jintużaw biex isostnu l-proċess ta' valutazzjoni tar-riskju tal-post tax-xogħol:

• Lista ta' verifika dwar l-OHS u l-applikazzjoni tal-enerġija solari fuq skala żgħira
• Lista ta' verifika dwar l-OHS u l-bini ekoloġiku
• Lista ta' verifika dwar l-OHS u l-enerġija mir-riħ