Ħafna attribwiti, bħall-għerf, il-ħsieb strateġiku, il-perċezzjoni olistika u l-kapaċità tad-deliberazzjoni, jiżdiedu jew joħorġu għall-ewwel darba maż-żieda fl-età. L-esperjenza tax-xogħol u l-kompetenza wkoll jakkumulaw mal-età.

Iżda xi kapaċitajiet funzjonali, l-iżjed dawk fiżiċi u sensorji, jonqsu b’riżultat tal-proċess naturali tat-tixjiħ. It-tibdil potenzjali fil-kapaċitajiet funzjonali għandu jitqies fil-valutazzjoni tar-riskju (ara hawn taħt), u x-xogħol u l-ambjent tax-xogħol għandhom jiġu mmodifikati biex jindirizzaw dak it-tibdil.

It-tibdil relatat mal-età fil-kapaċità funzjonali mhuwiex uniformi minħabba d-differenzi individwali fl-istil tal-ħajja, in-nutrizzjoni, l-idoneità, il-predispożizzjoni ġenetika għall-mard, il-livell edukattiv, u x-xogħol u ambjenti oħra.

Il-ħaddiema akbar fl-età mhumiex grupp omoġenju; jista’ jkun hemm differenzi konsiderevoli bejn individwi tal-istess età.

It-tnaqqis relatat mal-età jaffettwa prinċipalment il-kapaċitajiet fiżiċi u sensorji, li huma l-iżjed rilevanti għal xogħol fiżiku iebes. Il-bidla minn industrija estrattiva u tal-manifattura għal industrija tas-servizzi u bbażata fuq l-għarfien, kif ukoll żieda fl-awtomazzjoni u l-mekkanizzazzjoni tal-kompiti u l-użu ta’ tagħmir motorizzat, naqqsu l-ħtieġa għal xogħol fiżiku iebes.

F’dan il-kuntest ġdid, ħafna kapaċitajiet u ħiliet assoċjati ma’ persuni akbar fl-età, bħal ħiliet interpersonali tajbin, is-servizz lill-klijent u s-sensibilizzazzjoni dwar il-kwalità, huma dejjem iżjed ta’ valur.

Barra minn hekk, ħafna tibdil relatat mal-età huwa iżjed rilevanti f’xi attivitajiet professjonali milli f’oħrajn. Pereżempju, it-tibdil fiż-żamma tal-bilanċ għandu implikazzjoni għall-ħaddiema tat-tifi tan-nar u għall-persunal tas-salvataġġ li jaħdmu f’kundizzjonijiet estremi, jilbsu tagħmir tqil u jerfgħu u jġorru n-nies; it-tnaqqis fil-kapaċità li tittieħed deċiżjoni korretta dwar distanzi u l-veloċità ta’ oġġetti li qed jiċċaqilqu għandu implikazzjoni għas-sewqan billejl iżda ma jaffettwax lill-ħaddiema tal-uffiċċju.

L-età hija biss aspett wieħed ta’ forza tax-xogħol diversa. Valutazzjoni tar-riskju sensittiva għall-età tfisser li jitqiesu l-karatteristiċi relatati mal-età ta’ gruppi ta' etajiet differenti meta jiġu vvalutati r-riskji, inkluż it-tibdil potenzjali fil-kapaċitajiet funzjonali u fil-qagħda tas-saħħa.

Ir-riskji rilevanti b’mod partikolari għall-ħaddiema akbar fl-età jinkludu:

• Ammont ta’ xogħol fiżiku iebes
• Perikli relatati max-xogħol bix-xift
• Ambjenti tax-xogħol sħan, kesħin jew storbjużi

Hekk kif id-differenzi interindividwali jiżdiedu mal-età, m’għandhomx isiru preżunzjonijiet purament abbażi tal-età. Il-valutazzjoni tar-riskju għandha tqis il-ħtiġijiet tax-xogħol fir-rigward tal-kapaċitajiet u l-qagħda tas-saħħa tal-individwu.

Sir af aktar dwar l-għodda attwali tal- Proġett Interattiv fuq l-Internet dwar il-Valutazzjoni tar-Riskji (OiRA) disponibbli, il-valutazzjonijiet tar-riskji sensittivi għall-età u l-iżgurar li kulħadd huwa kopert.

Il-Kapaċità għax-Xogħol hija l-bilanċ bejn ix-xogħol u r-riżorsi individwali; meta x-xogħol u r-riżorsi individwali joqogħdu sew flimkien, il-kapaċità għax-xogħol tkun tajba. Il-fatturi ewlenin li jaffettwaw dan huma:

• Il-kapaċitajiet tas-saħħa u funzjonali
• L-edukazzjoni u l-kompetenza
• Il-valuri, l-attitudnijiet u l-motivazzjoni
• L-ambjent tax-xogħol u l-komunità
• Il-kontenut, il-ħtiġijiet u l-organizzazzjoni tax-xogħol

Il-kapaċità għax-xogħol tista’ titkejjel bl-Indiċi tal-Kapaċità għax-Xogħol. Il-kunċett ta’ kapaċità għax-xogħol jissuġġerixxi li l-azzjonijiet fuq il-post tax-xogħol għall-promozzjoni tal-kapaċità għax-xogħol għandhom ikopru dawn il-fatturi kollha.

Is-saħħa tan-nies iżjed tard fil-ħajja hija affettwata mill-imġiba tagħhom fir-rigward tas-saħħa iżjed kmieni fil-ħajja. It-tnaqqis fil-kapaċitajiet funzjonali jista’ jittawwal u jiġi mminimizzat bi drawwiet ta’ stil ta’ ħajja b’saħħitha, bħal eżerċizzju regolari u ikel bnin. Il-post tax-xogħol għandu rwol ewlieni fil-promozzjoni ta’ stil ta’ ħajja b’saħħitha u fl-appoġġ ta’ attivitajiet li jipprevjenu t-tnaqqis fiżiku, u b’hekk jgħin fiż-żamma tal-kapaċità għax-xogħol. Il-promozzjoni tas-saħħa fuq il-post tax-xogħol (WHP) tkopri varjetà ta’ suġġetti inkluż id-dieta u n-nutrizzjoni, il-konsum tal-alkoħol, it-twaqqif tat-tipjip u li persuna jkollha biżżejjed eżerċizzju, irkupru u rqad.

Disinn tajjeb tal-post tax-xogħol huwa ta’ benefiċċju għall-gruppi tal-etaijiet kollha, inkluż għall-ħaddiema akbar fl-età. Hekk kif jinbidlu l-kapaċitajiet, ix-xogħol għandu jinbidel ukoll biex jikkumpensa, pereżempju permezz bi:

• Tfassil mill-ġdid jew rotazzjoni tax-xogħol
• Brejks qosra aktar spissi
• Organizzazzjoni mtejba ta’ xogħol bix-xift, eż. sistema ta’ rotazzjoni tax-xifts mgħaġġla (2–3 ijiem)
• Dawl tajjeb u kontroll tal-istorbju
• Disinn ergonomiku tajjeb tat-tagħmir

Il-mard fit-tul jista’ jwassal għal problemi fis-saħħa mentali, esklużjoni soċjali u tluq bikri mis-suq tax-xogħol. L-iffaċilitar tar-ritorn tal-ħaddiema wara l-mard huwa kruċjali għall-appoġġ ta’ forza tax-xogħol li qed tikber fl-età. Eżempji ta’ inizjattivi meħuda biex jiġi promoss ir-ritorn lejn ix-xogħol f’pajjiżi Ewropej jinkludu l-ħolqien tan-‘nota li wieħed ikun kapaċi jaħdem’ minflok in-nota ta’ mard fir-Renju Unit u proġett ta’ intervent għal Ritorn lejn ix-Xogħol fid-Danimarka.

Aqra r-rapport tal-EU-OSHA dwar lura għax-xogħol u sir af aktar fil-folja tal-fatti relatata.

Il-Kampanja għal Postijiet tax-xogħol siguri 2026-2028 “Flimkien għas-saħħa mentali fuq ix-xogħol” għandha l-għan li tqajjem kuxjenza dwar l-impatt tar-riskji psikosoċjali u tippromwovi l-ħolqien ta’ ambjenti tax-xogħol ta’ appoġġ, inklużivi u tajbin għas-saħħa mentali fis-setturi kollha.

Il-kampanja tappoġġa l-Qafas Strateġiku usa’ tal-Kummissjoni Ewropea dwar is-Sigurtà u s-Saħħa fuq il-Post tax-Xogħol 2021-2027. Dan is-suġġett huwa ta’ importanza dejjem tikber peress li d-data turi tnaqqis ġenerali fis-saħħa mentali tal-Ewropa, b’37 % tal-ħaddiema li jesperjenzaw għeja ġenerali u 29 % jesperjenzaw stress, dipressjoni jew ansjetà, skont l-Istħarriġ tal-OSH Pulse 2025.

Il-ħames oqsma ta’ prijorità ta’ din il-kampanja huma:

• Valutazzjoni u ġestjoni tar-riskju psikosoċjali
• Fastidju, fastidju sesswali u vjolenza
• Ir-riskji fiżiċi u s-saħħa mentali
• Ir-riskji psikosoċjali fis-settur tas-saħħa u tal-kura soċjali
• Appoġġ għas-saħħa mentali fuq il-post tax-xogħol

Il-kampanja Postijiet tax-xogħol li jġibu ’l quddiem is-saħħa 2023-25 tqajjem sensibilizzazzjoni dwar l-impatt ta’ teknoloġiji diġitali ġodda fuq ix-xogħol u fuq il-postijiet tax-xogħol u l-isfidi u l-opportunitajiet relatati mas-saħħa u s-sigurtà fuq il-post tax-xogħol (OSH) assoċjati. Hija tipprovdi wkoll pjattaforma għall-iskambju ta’ soluzzjonijiet ta prattika tajba.

F’konformità mal-approċċ “viżjoni żero” fir-rigward tal-imwiet relatati max-xogħol tal-Qafas Strateġiku tal-UE għas-Saħħa u s-Sikurezza fuq il-Post tax-Xogħol 2021-2027 kif ukoll l-objettivi tal-Istrateġija Diġitali Ewropea, il-kampanja tfittex li tpoġġi l-OSH fi ħdan dibattitu usa’ ta’ politika tal-UE kif ukoll tikkunsidra d-dimensjoni tal-ġeneru u l-ħtiġijiet ta’ gruppi speċifiċi ta’ ħaddiema li jinsabu f’riskju ogħla.

Ħames oqsma prijoritarji jagħtu struttura għall-kampanja:

• Xogħol fuq pjattaformi diġitali
• Robotika avvanzata u intelliġenza artifiċjali
• Xogħol mill-bogħod
• Sistemi diġitali intelliġenti
• Ġestjoni ta’ ħaddiema permezz ta’ intelliġenza artifiċjali

Il-kampanja hija prinċipalment ibbażata fuq is-sejbiet u r-riżorsi tal-Ħarsa Ġenerali tal-OSH dwar id-Diġitilizzazzjoni 2020-2023, iżda tinkludi wkoll ir-riċerka tal-EU-OSHA f’oqsma oħra, bħall-Istudji dwar il-prospettiva u l-Ħarsa ġenerali tal-OSH lejn l-Appoġġ għall-Konformità.

Il-kampanja tal-2020-22 tiffoka fuq il-prevenzjoni ta’ disturbi muskoluskeletali relatati max-xogħol (MSDs). 

L-MSDs ikomplu jkunu wieħed mit-tipi l-aktar prevalenti ta’ problemi tas-saħħa relatati max-xogħol fl-Ewropa.

Ir-riskji relatati mal-qagħda, l-esponiment għal movimenti ripetittivi jew għal pożizzjonijiet ta’ għeja jew ta’ uġigħ, il-ġarr jew it-tqandil ta’ tagħbijiet tqal — dawn il-fatturi kollha ta’ riskju komuni ħafna fuq il-post tax-xogħol jistgħu jikkawżaw l-MSDs. Meta jitqies kemm huma mifruxa sew l-MSDs relatati max-xogħol, jidher ċar li jeħtieġ isir aktar biex titqajjem sensibilizzazzjoni dwar kif dawn jistgħu jiġu evitati.

Il-kampanja tħares lejn il-kawżi ta’ din il-problema persistenti b’mod komprensiv. Din għandha l-għan li tqassam informazzjoni ta’ kwalità għolja dwar is-suġġett, tħeġġeġ approċċ integrat għall-ġestjoni tal-problema, u toffri għodod u soluzzjonijiet prattiċi li jistgħu jgħinu fil-livell tal-post tax-xogħol. 

Sir af aktar dwar id-disturbi muskoloskeletali relatati max-xogħol

L-esponiment għal sustanzi perikolużi huwa ħafna aktar komuni fil-postijiet tax-xogħol tal-Ewropa milli ħafna nies jimmaġinaw u għandu jsir aktar biex il-ħaddiema jiġu protetti minn tali perikli. L-għan tal-kampanja tal-2018-19 Postijiet tax-Xogħol li Jġibu ’l Quddiem is-Saħħa Jimmaniġġjaw is-Sustanzi Perikolużi kien li tqajjem sensibilizzazzjoni dwar sustanzi perikolużi fuq il-post tax-xogħol u r-riskji li jippreżentaw, u li toħloq kultura ta’ prevenzjoni billi tqassam materjali tal-kampanja u twettaq attivitajiet promozzjonali u ta’ involviment. Din iġġenerat bażi ta’ għarfien dwar kif għandhom jiġu ġestiti b’mod effettiv is-sustanzi perikolużi, inkluża informazzjoni dwar il-qafas legali u ta’ politika eżistenti, soluzzjonijiet ta’ prattika tajba, għodod u strumenti, u ideat għal azzjonijiet ta’ komunikazzjoni u ta’ sensibilizzazzjoni ta’ suċċess.

Punti ewlenin speċifiċi tal-kampanja ġew attribwiti lil gruppi vulnerabbli, is-sostituzzjoni u l-karċinoġeni u l-kanċer relatat max-xogħol, li jirrappreżentaw l-ogħla proporzjon ta’ mard okkupazzjonali fatali fl-UE. Bħala wieħed mil-legati tal-kampanja, l-EU-OSHA tibqa’ tkun sieħba attiva tal-Pjan Direzzjonali dwar il-karċinoġeni, skema Ewropea ta’ azzjoni biex jitnaqqas tali esponiment.

Sir af aktar dwar il-ġestjoni sikura ta’ sustanzi perikolużi fuq il-post tax-xogħol

Il-kampanja Postijiet tax-Xogħol li Jieħdu Ħsieb is-Saħħa f’Kull Età ppromwoviet l-importanza tax-xogħol sostenibbli — jiġifieri, kundizzjonijiet tax-xogħol siguri u li jieħdu ħsieb is-saħħa mill-bidu sat-tmiem tal-ħajja ta’ persuna. Peress li l-forza tax-xogħol tal-Ewropa qed tixjieħ u l-etajiet tal-irtirar qed jiżdiedu, qed isir dejjem iktar importanti li l-kundizzjonijiet tax-xogħol ikunu sikuri, li jieħdu ħsieb is-saħħa u ġusti. Dan se jippermetti li n-nies jaħdmu għal perjodu itwal ta’ żmien u jirtiraw f’saħħa tajba.
Il-kampanja enfasizzat modi biex jiġu ġestiti l-OSH fil-kuntest ta’ forza tax-xogħol li qed tixjieħ u ħeġġet l-iskambju ta’ informazzjoni u prattiki tajba. It-tibdil demografiku jaffettwa l-biċċa l-kbira tal-postijiet tax-xogħol fl-Ewropa. Madankollu, bl-introduzzjoni ta’ miżuri biex ikun żgurat li x-xogħol ikun sostenibbli, l-intrapriżi u l-organizzazzjonijiet jistgħu jimminimizzaw l-effetti negattivi u jżidu l-produttività, b’hekk ix-xogħol isir aktar sikur u li jġib aktar ’il quddiem is-saħħa għal kulħadd. 

 Sir af aktar dwar it-tixjiħ u s-sigurtà u s-saħħa okkupazzjonali

Ambjent tax-xogħol psikosoċjali ta’ kwalità baxxa jista’ jkollu effetti negattivi sinifikanti fuq is-saħħa tal-ħaddiema.

Ir-riskji psikosoċjali jseħħu f’kull post tax-xogħol, iżda anke b’riżorsi limitati biss, dawn jistgħu jiġu vvalutati u ġestiti b’suċċess. Din il-kampanja pprovdiet appoġġ u gwida għall-ħaddiema u l-impjegaturi biex jiġġestixxu l-istress relatat max-xogħol u r-riskji psikosoċjali, u ppromwoviet l-użu ta’ għodod prattiċi u faċli għall-utent biex dan jiġi ffaċilitat.

 Sir af aktar dwar ir-riskji psikosoċjali u l-istress fuq il-post tax-xogħol

Il-kampanja tal-Aġenzija għall-2012-2013 iffokat fuq il-prevenzjoni tar-riskju. F’termini sempliċi, il-prevenzjoni hija dwar il-ġestjoni tar-riskji relatati max-xogħol bl-għan aħħari li jitnaqqas l-għadd ta’ inċidenti relatati max-xogħol u l-mard okkupazzjonali.

Ir-responsabbiltà finali għall-ġestjoni tar-riskju hija tal-impjegaturi u tal-maniġment superjuri, iżda l-isforzi tagħhom għandhom probabbiltà kbira li jfallu mingħajr il-parteċipazzjoni attiva tal-ħaddiema.

Għal dawn ir-raġunijiet, din il-kampanja poġġiet enfasi speċjali fuq l-importanza tat-tmexxija mill-maniġment superjuri u mis-sidien li jaħdmu flimkien mal-parteċipazzjoni attiva tal-ħaddiema.

Sir af aktar dwar it-tmexxija u l-parteċipazzjoni tal-ħaddiema

Il-manutenzjoni hija attività komuni ħafna: din taffettwa kull post tax-xogħol, f’kull settur tal-industrija, u tikkonċerna lil kulħadd f’kull livell (mhux biss lill-ħaddiema li fid-deskrizzjoni tal-impjieg tagħhom ikollhom miktub “manutenzjoni”).

Din il-kampanja enfasizzat l-importanza tal-manutenzjoni sikura bħala parti ċentrali mill-prattika ta’ ħidma ta’ saħħa u sigurtà tajba.

U filwaqt li d-dettalji speċifiċi jvarjaw bejn is-setturi tal-industrija (pereżempju skont it-tipi speċifiċi ta’ makkinarji li jintużaw), din identifikat prinċipji li huma komuni għall-manutenzjoni xierqa, fil-postijiet tax-xogħol differenti kollha tal-Ewropa.

L-għanijiet tal-kampanja:

• Tqajjem sensibilizzazzjoni dwar l-importanza tal-manutenzjoni għas-sikurezza u s-saħħa tal-ħaddiema, dwar ir-riskji assoċjati mal-manutenzjoni, u dwar il-ħtieġa li din titwettaq b’mod sikur;
• Tqajjem sensibilizzazzjoni dwar ir-responsabbiltajiet legali u oħrajn tal-impjegaturi biex titwettaq manutenzjoni sikura, u dwar il-każ tan-negozju biex dan isir;
• Tippromwovi approċċ sempliċi u strutturat għall-ġestjoni tal-OHS fil-manutenzjoni, abbażi ta’ valutazzjoni tar-riskju xierqa (il-“ħames regoli bażiċi”).

Naturalment, l-għan aħħari kien li jitnaqqas l-għadd ta’ persuni li qed iweġġgħu jew li qed jesperjenzaw problemi ta’ saħħa minħabba manutenzjoni inadegwata jew nuqqas ta’ manutenzjoni, issa u fil-futur.

Aktar informazzjoni:

• OSHwiki
• Pubblikazzjonijiet

Il-valutazzjoni tar-riskju hija l-pedament tal-ġestjoni tas-saħħa u s-sigurtà fuq il-post tax-xogħol.

L-għan ġenerali ta’ din il-kampanja kien li tippromwovi approċċ ta’ ġestjoni integrata għall-valutazzjoni tar-riskju, tgħin lill-organizzazzjonijiet iwettquh b’mod sistematiku, u tittieħed azzjoni fuq ir-riżultati tiegħu.

Din fittxet li tqajjem sensibilizzazzjoni dwar l-obbligi legali li l-impjegaturi għandhom iwettqu valutazzjonijiet tar-riskju, iżda anke li tiċċara l-proċess tal-valutazzjoni tar-riskju; il-valutazzjoni tar-riskju mhijiex neċessarjament ikkumplikata, burokratika jew kompitu għall-esperti biss. Din irrakkomandat approċċ sempliċi u gradwali, iżda anke wieħed fejn il-forza tax-xogħol tiġi kkonsultata u involuta.

L-għodda Onlibe tagħna ta’ Valutazzjoni tar-Riskju interattiva (OiRA) hija l-legat ta’ din il-kampanja u tista’ titqies bħala s-soluzzjoni tas-seklu 21 għall-isfida li jiġu promossi s-saħħa u s-sikurezza okkupazzjonali għall-intrapriżi mikro u żgħar. Il-proġett OiRA għandu l-potenzjal li jgħin bosta eluf ta’ kumpaniji żgħar madwar l-UE biex iwettqu valutazzjonijiet tar-riskju b’mod sempliċi u kosteffettiv.

Aktar informazzjoni:

• OSHwiki
• Is-sit tal-proġett OiRA

L-inizjattiva tal-Postijiet tax-Xogħol li jġibu ’l Quddiem is-Saħħa kellha l-għan tipprovdi lill-impjegaturi u lill-ħaddiema f’intrapriżi żgħar u ta’ daqs medju (SMEs) aċċess faċli għal informazzjoni dwar kif jagħmlu l-postijiet tax-xogħol tagħhom aktar sikuri, aktar tajbin għas-saħħa u aktar produttivi.

Din saret fi 12-il Stat Membru Ewropew: Ċipru, ir-Repubblika Ċeka, l-Estonja, l-Ungerija, il-Latvja, il-Litwanja, Malta, il-Polonja, ir-Repubblika Slovakka, is-Slovenja, il-Bulgarija u r-Rumanija kif ukoll it-Turkija u l-Kroazja.

Il-kampanja kienet immirata lejn l-SMEs bil-messaġġ: “Is-Saħħa u s-Sigurtà jikkonċernaw lil kulħadd. Tajjeb għalik. Tajjeb għan-negozji!”.

Sir af aktar dwar is-saħħa u s-sikurezza okkupazzjonali f’intrapriżi mikro u żgħar

Id-disturbi muskoloskeletali (MSDs), li jaffettwaw il-muskoli, il-ġogi, l-għeruq, il-ligamenti u n-nervaturi tal-ġisem, huma l-akbar kawża ta’ assenza mix-xogħol prattikament fl-Istati Membri kollha tal-UE.

Din il-kampanja fittxet li tippromwovi approċċ ta’ ġestjoni integrata għal din il-problema, filwaqt li enfasizzat l-idea li l-impjegaturi, l-impjegati u l-gvern għandhom jaħdmu flimkien biex jindirizzaw l-MSDs.

Din enfasizzat il-kunċett tal-“ġestjoni tal-piż”: billi ma jitqiesx biss il-piż li qed jiġi esperjenzat, pereżempju, iżda anke l-piżijiet kollha li qed jitpoġġew fuq il-ġisem minn fatturi ambjentali, u l-pass li bih jitwettaq il-kompitu.

Din enfasizzat ukoll l-importanza li jiġu ġestiti r-ritenzjoni, ir-riabilitazzjoni u r-ritorn lejn ix-xogħol ta’ dawk li jsofru, jew li sofrew, mill-MSDs.

Sir af aktar dwar id-disturbi muskoloskeletali relatati max-xogħol

Din il-kampanja kienet iddedikata biex jiġi żgurat li ż-żgħażagħ ikollhom bidu sikur u b’saħħtu fil-ħajja professjonali tagħhom.

Iż-żgħażagħ huma partikolarment vulnerabbli f’ambjenti tax-xogħol, fejn spiss ma jkunx hemm provvista xierqa ta’ saħħa u sikurezza okkupazzjonali għalihom.

Madankollu, il-maġġoranza tal-inċidenti u l-problemi tas-saħħa li jaffettwaw lill-ħaddiema żgħażagħ jistgħu jiġu evitati u ż-żgħażagħ huma riċettivi għal informazzjoni dwar is-saħħa u s-sikurezza fuq il-post tax-xogħol, u se jaġixxu biex jipproteġu lilhom infushom meta jkunu jafu dwar perikli potenzjali.

Din il-kampanja kienet tinvolvi l-promozzjoni tas-sensibilizzazzjoni tar-riskji fost iż-żgħażagħ u l-impjegaturi fuq il-post tax-xogħol, kif ukoll fl-iskejjel u l-kulleġġi: li wieħed jipprova jilħaq liż-żgħażagħ minn età bikrija, biex titrawwem fihom kultura ta’ prevenzjoni tar-riskju.

Sir af aktar dwar iż-żgħażagħ u s-saħħa u s-sikurezza fuq il-post tax-xogħol

Mhumiex biss il-ħaddiema f’industriji bħall-kostruzzjoni jew il-manifattura li huma f’riskju. L-istorbju jista’ jkun problema f’bosta ambjenti tax-xogħol, minn fabbriki sa azjendi agrikoli, ċentri telefoniċi sa swali tal-kunċerti.

Din il-kampanja ffukat fuq il-kwistjoni li jiġi ġestit l-istorbju fuq il-post tax-xogħol, bil-motto “L-istorbju fuq il-post tax-xogħol – jista’ jiswik aktar mis-smigħ tiegħek”.

Sir af aktar dwar il-problemi tal-istorbju minn OSHwiki

Il-kostruzzjoni hija waħda mill-akbar industriji tal-Ewropa.

Sfortunatament, din għandha wkoll waħda mill-agħar rekords tas-saħħa u s-sikurezza okkupazzjonali, problema li tiswa lin-negozji u lill-kontribwenti biljuni ta’ Euro kull sena, minbarra t-tbatija terribbli li tikkawża lill-bnedmin.

Din il-kampanja tfasslet biex tgħin lill-partijiet interessati kollha fl-industrija jibnu ambjent tax-xogħol aktar sikur, aktar b’saħħtu u aktar produttiv.

Aktar informazzjoni: OSHwiki

Madwar l-Ewropa, miljuni ta’ impjegati huma esposti għal sustanzi perikolużi fil-postijiet tax-xogħol tagħhom, u jekk ma jiġux ikkontrollati r-riskji assoċjati, dan jista’ jikkawża ħsara lis-saħħa tal-persuni b’ħafna modi differenti.

Il-leġiżlazzjoni Ewropea tistabbilixxi l-obbligi tal-impjegaturi biex jimmaniġġjaw tali riskji, u hemm disponibbli ammont kbir ta’ gwida għall-impjegaturi u għall-ħaddiema, iżda jeħtieġ li tittieħed azzjoni dwarhom biex tiġi protetta s-saħħa tal-ħaddiema.

Għan ewlieni ta’ din il-kampanja kien li tqajjem sensibilizzazzjoni dwar ir-riskji, u li tistimola azzjoni biex jitnaqqsu r-riskji għas-saħħa tal-użu ta’ sustanzi perikolużi.

Sir af aktar dwar il-ġestjoni sikura ta’ sustanzi perikolużi fuq il-post tax-xogħol

L-istress huwa responsabbli għal miljuni ta’ jiem ta’ xogħol mitlufa kull sena.

Għadd kbir wisq ta’ vittmi jsofru fis-silenzju u għadd kbir ta’ kumpaniji ma jirrealizzawx sa liema punt l-istress jagħmel ħsara lill-prestazzjoni tan-negozju tagħhom.

Din il-kampanja ffukat fuq il-prevenzjoni u l-ġestjoni tal-istress fuq il-post tax-xogħol.

Sir af aktar dwar ir-riskji psikosoċjali u l-istress fuq il-post tax-xogħol

Kull sena eluf ta’ nies jinqatlu f’inċidenti fuq il-post tax-xogħol madwar l-Unjoni Ewropea, u hemm miljuni ta’ inċidenti li jirriżultaw f’assenzi minn xogħol ta’ aktar minn tlett ijiem.

Il-problema hija partikolarment akuta fl-intrapriżi żgħar u ta’ daqs medju.

Din il-kampanja ffukat fuq il-prevenzjoni ta’ inċidenti relatati max-xogħol.

Sir af aktar dwar is-suġġett minn OSHwiki

Id-disturbi muskoloskeletali (MSDs) huma waħda mill-aktar problemi komuni relatati max-xogħol, li jaffettwaw miljuni ta’ ħaddiema Ewropej fis-setturi kollha tal-impjiegi, bi spiża ta’ biljuni ta’ Euro għall-impjegaturi.

Madankollu, il-parti l-kbira tal-problema tista’ tiġi evitata jew imnaqqsa billi jiġu segwiti r-regolamenti eżistenti dwar is-saħħa u s-sikurezza u l-gwida dwar il-prattika tajba.

L-ewwel waħda mill-kampanji tal-EU-OSHA ffukat fuq il-ġestjoni effettiva tar-riskji tal-MSDs.

Sir af aktar dwar id-disturbi muskoloskeletali relatati max-xogħol

• Id-Direttiva Qafas dwar l-OSH

• Postijiet tax-xogħol, tagħmir, sinjali, tagħmir personali protettiv

• Esponiment għal sustanzi kimiċi u sikurezza kimika

• Esponiment għal perikli fiżiċi

• Esponiment għal aġenti bioloġiċi

• Dispożizzjonijiet dwar l-ammont ta’ xogħol, ir-riskji ergonomiċi u psikosoċjali

• Dispożizzjonijiet speċifiċi għas-settur u relatati mal-ħaddiema

Is-sommarji tad-direttivi huma disponibbli bl-Ingliż biss, iżda l-links li ssib fi tmiem kull sommarju jwasslu għat-test sħiħ tad-direttiva fil-lingwi kollha tal-UE.

Barra mid-Direttiva Qafas, ġiet adottata sensiela ta’ direttivi individwali li jiffukaw fuq aspetti speċifiċi tas-sigurtà u s-saħħa fil-post tax-xogħol. Madankollu d-Direttiva Qafas tibqa’ tapplika għas-setturi kollha li huma koperti mid-direttivi individwali. Dawn id-dispożizzjonijiet speċjali jipprevalu meta d-direttivi individwali jkollhom dispożizzjonijiet aktar stretti u speċifiċi. Id-direttivi individwali jfasslu l-prinċipji tad-Direttiva Qafas għal:

• Kompiti speċifiċi (eż. tqandil manwali ta’ tagħbijiet)
• Perikli speċifiċi fuq il-post tax-xogħol (eż. esponiment għal sustanzi perikolużi jew għal sustanzi fiżiċi)
• Setturi u postijiet tax-xogħol speċifiċi (eż. postijiet tax-xogħol temporanji, l-industriji estrattivi, il-bastimenti tas-sajd)
• Gruppi ta’ ħaddiema speċifiċi (eż. nisa tqal, ħaddiema żgħażagħ, ħaddiema b’kuntratti ta’ impjieg għal żmien fiss)
• Ċerti aspetti relatati max-xogħol (eż. l-organizzazzjoni tal-ħin tax-xogħol)

Id-direttivi individwali jiddefinixxu kif għandhom jiġu vvalutati dawn ir-riskji u, f’ċerti każijiet, jistipulaw valuri tal-limitu fuq ċerti sustanzi jew aġenti.

Il-Kummissjoni Ewropea ħabbret it-tliet azzjonijiet ewlenin tagħha tas-sigurtà u s-saħħa okkupazzjonali fil-Komunikazzjoni tagħha Saħħa u Sikurezza fuq ix-Xogħol għal Kulħadd - Modernizzazzjoni tal-Politika u tal-Leġiżlazzjoni tal-UE dwar is-Saħħa u s-Sikurezza Okkupazzjonali, li hija bbażata fuq l-evalwazzjoni ex post tad-Direttivi tal-Unjoni Ewropea dwar is-saħħa u s-sikurezza fuq il-post tax-xogħol (Evalwazzjoni REFIT).

Barra dan, għadd ta’ direttivi tal-UE li huma bbażati fuq l-Artikolu 114 tat-Trattat dwar il-Funzjonament tal-Unjoni Ewropea huma relatati ma’ aspetti tas-sigurtà u s-saħħa Fuq dik il-bażi legali, ġiet adottata sensiela ta’ direttivi tekniċi taħt l-hekk imsejjaħ “Approċċ Ġdid” fejn l-organizzazzjonijiet Ewropej ta’ standardizzazzjoni – il-Kumitat Ewropew għall-Istandardizzazzjoni (CEN), il-Kumitat Ewropew għall-Istandardizzazzjoni Elettroteknika (CENELEC) u l-Istitut Ewropew għall-Istandards tat-Telekomunikazzjoni (ETSI) – jistipulaw u jaġġornaw l-istandards Ewropej regolarment.

Il-Qafas Strateġiku tal-UE dwar is-Saħħa u s-Sikurezza Okkupazzjonali 2021-2027 jistabbilixxi l-qafas politiku għall-politika Ewropea dwar is-sigurtà u s-saħħa. Il-punt tat-tluq għall-inizjattivi leġiżlattivi fil-livell Ewropew huwa proposta leġiżlattiva abbozzat mill-Kummissjoni Ewropea. Taħt il-“proċedura leġiżlattiva ordinarja”, huma l-Kunsill Ewropew u l-Parlament Ewropew li jadottaw direttivi tal-UE. F’xi każijiet, dawn jiddelegaw is-setgħa leġiżlattiva li jadattaw id-direttivi għall-progress tekniku lill-Kummissjoni Ewropea.

Is-Sħab Soċjali Ewropej għandhom rwol vitali fil-proċess Ewropew tat-teħid ta’ deċiżjonijiet fil-qasam tas-sigurtà u s-saħħa fil-post tax-xogħol, peress li jridu jiġu kkonsultati f’diversi stadji. It-Trattat dwar il-Funzjonament tal-Unjoni Ewropea jipprevedi wkoll il-possibbiltà li jiġu konklużi ftehimiet awtonomi. Sa issa, id-djalogu soċjali Ewropew irriżulta fl-adozzjoni ta’ diversi ftehimiet awtonomi.

L-ewwel direttivi Ewropej dwar is-sigurtà u s-saħħa fil-post tax-xogħol ġew adottati fuq il-bażi tad-dispożizzjonijiet ġenerali għall-armonizzazzjoni tas-suq. Dan kien minħabba n-nuqqas ta’ kompetenza leġiżlattiva espliċita fit-Trattat fil-qasam tas-sigurtà u s-saħħa fil-post tax-xogħol sa nofs it-tmeninijiet. Qabel dan, is-sigurtà u s-saħħa okkupazzjonali kienu meqjusa bħala anness għall-armonizzazzjoni tas-suq u għall-politiki ekonomiċi tal-Komunità Ekonomika Ewropea. Pereżempju, id-Direttiva 77/576/KEE dwar l-armonizzazzjoni tal-liġijiet nazzjonali dwar is-sinjali ta’ sikurezza fuq il-post tax-xogħol u d-Direttiva 78/610/KEE dwar l-armonizzazzjoni tal-limiti ta’ esponiment okkupazzjonali għall-monomeri tal-klorur tal-vinil ġew adottati fuq din il-bażi.

L-Att Uniku Ewropew tal-1987 kien pass ewlieni ’l quddiem għaliex introduċa dispożizzjoni legali ġdida dwar il-politika soċjali għat-Trattat bl-għan ta’ “titjib, b’mod speċjali fl-ambjent tax-xogħol, fir-rigward tas-saħħa u s-sigurtà tal-ħaddiema”. Bid-dħul ta’ din id-dispożizzjoni fit-Trattat, l-importanza tal-kundizzjonijiet tax-xogħol sikuri saret evidenti. Barra minn hekk, il-Kapitolu Soċjali ġdid awtorizza lill-Kummissjoni Ewropea biex tippromwovi d-djalogu soċjali bejn l-impjegaturi u r-rappreżentanti tal-ħaddiema fil-livell Ewropew.

Bit-Trattat ta’ Amsterdam fl-1997, il-kompetenza leġiżlattiva fil-qasam tal-politiki soċjali Ewropej issaħħet iżjed bl-inkorporazzjoni tal-ftehim soċjali fit-Trattat. It-Trattat ta’ Lisbona — minbarra r-rinumerazzjoni tal-Artikoli dwar il-politika soċjali — żamm is-sustanza tad-dispożizzjonijiet tal-ex Artikoli 136 ff TUE (issa l-Artikoli 151 ff tat-Trattat dwar il-Funzjonament tal-Unjoni Ewropea).

Il-mexxejja tal-intrapriża — il-maniġment superjuri, id-diretturi u/jew il-bord — huma f’pożizzjoni li jipprevjenu l-aċċidenti u l-mard fuq il-post tax-xogħol. Dan jistgħu jagħmluh billi:

• Jimpenjaw ruħhom għal strateġija effikaċi għall-ġestjoni tal-OSH u jikkomunikawha
• Jiżviluppaw sistemi robusti ta’ ġestjoni tas-saħħa u s-sigurtà
• Jimmonitorjaw il-prestazzjoni ta’ dawk is-sistemi
• Jagħtu eżempju tajjeb billi jsegwu f’kull ħin il-proċeduri kollha ta’ sigurtà
• Jimmotivaw lill-persunal biex jipparteċipa fl-iżgurar ta’ saħħa u sigurtà tajbin

It-tmexxija ineffikaċi jew ineżistenti tal-OSH tista’ tirriżulta f'aċċidenti jew anke f’fatalitajiet kif ukoll saħħa mentali u fiżika ħażina fost il-ħaddiema. Tista’ tagħmel ħsara lir-reputazzjoni ta’ kumpanija. Tmexxija ħażina jista’, fil-fatt, ikollha spejjeż finanzjarji sinifikanti b’riżultat ta’, pereżempju, ġranet ta’ mard, ħin moħli u ħlasijiet ta’ kumpens.

Tmexxija tajba tal-OSH, min-naħa l-oħra:

• Tipprevjeni l-aċċidenti u l-mard
• Iżżid il-produttività u l-effiċjenza
• Ittejjeb il-moral tal-impjegati
• Tgħin lin-negozji jirbħu kuntratti ġodda u jattiraw impjegati ta’ kwalità għolja

Hemm xi passi sempliċi li tista’ tieħu biex tiżgura li l-organizzazzjoni tiegħek tibbenefika minn tmexxija tajba tal-OSH. Dawn huma xi għajnuniet prattiċi, ibbażati fuq gwida żviluppata mill-Health and Safety Executive Brittaniku:

• Wettaq valutazzjonijiet regolari tar-riskji u ħu azzjoni fuq ir-riżultati
• Dejjem qis l-implikazzjonijiet fuq is-saħħa u s-sigurtà meta tintroduċi membri ġodda tal-persunal, proċessi u metodi tax-xogħol ġodda
• Tmexxija viżibbli hija tmexxija effikaċi. Kun żgur li l-mexxejja jagħmlu żjarat regolari fuq il-‘post tax-xogħol’ tal-organizzazzjoni tiegħek biex jitkellmu mal-impjegati dwar il-problemi u s-soluzzjonijiet relatati mal-OSH
• Uri impenn billi tiżgura li l-kwistjonijiet tas-saħħa u s-sigurtà jkunu dejjem fuq l-aġenda fil-laqgħat tal-bord
• Ipprovdi taħriġ dwar is-saħħa u s-sigurtà lill-mexxejja kollha, biex tippromwovi sensibilizzazzjoni ikbar dwar il-valur tal-OSH

Waħda fatturi ewlenin għal tmexxija tajba tal-OSH hija l-involviment tal-ħaddiema. L-impjegaturi għandhom dmir legali li jikkonsultaw mal-impjegati dwar kwistjonijiet ta’ saħħa u sigurtà. Iżda hemm benefiċċji li wieħed imur lil hinn mir-rekwiżiti minimi. Il-ġestjoni tal-OSH hija aktar probabbli li tirnexxi jekk tinkoraġġixxi l-parteċipazzjoni attiva tal-ħaddiema u tistabbilixxi djalogu bejn l-impjegati u l-maniġment.

Fl-2012, l-EU-OSHA organizzat kampanja ta’ sentejn dwar dan is-suġġett, imsejħa Kampanja dwar il-Postijiet tax-Xogħol li jġibu ’l quddiem is-Saħħa 2012-2013 Naħdmu Flimkien biex Nevitaw ir-Riskji.

Din il-kampanja ntemmet b’avveniment ta’ valutazzjoni komparattiva li matulu s-sħab tal-kampanja skambjaw eżempji ta’ prattika tajba, b’workshops dwar suġġetti bħal ‘Taħriġ fit-tmexxija’ u ‘Il-kultura tas-saħħa u s-sigurtà ta’ organizzazzjoni’.