In-Network Enterprise Europe (EEN) jgħin lin-negozji biex jinnovaw u jikbru fuq skala internazzjonali. Huwa l-akbar network ta’ appoġġ fid-dinja għall-intrapriżi żgħar u ta’ daqs medju (SMEs) b’ambizzjonijiet internazzjonali.

In-Network huwa attiv fuq livell dinji. Jgħaqqad flimkien esperti minn organizzazzjonijiet membri li huma magħrufa għall-eċċellenza tagħhom fl-appoġġ ta’ negozji.

Il-Proġett dwar Sħubija fil-Komunikazzjoni (CPP) għandu l-għan li jżid is-sensibilizzazzjoni tal-importanza tal-OSH għall-SMEs u biex dawn jingħataw aċċess faċli għal informazzjoni prattika u kuntatti utli fil-livelli nazzjonali u reġjonali, fosthom laqgħat ta’ sħubija nazzjonali, pakketti ta’ sensibilizzazzjoni u attivitajiet oħra bħall-Premjijiet għall-OSH tal-EEN.

Il-membri tal-EEN huma wħud mis-sħab ewlenin li jgħinu lill-EU-OSHA tilħaq l-objettivi tagħha, flimkien mad-Direttorat Ġenerali għas-Suq Intern, l-Industrija, l-Intraprenditorija u l-SMEs (DĠ GROW), il-Kunsill Ewropew tal-Innovazzjoni u l-Aġenzija Eżekuttiva għall-SMEs (EISMEA) u l-punti fokali nazzjonali tal-EU-OSHA.

Id-Direttorat Ġenerali għas-Suq Intern, l-Industrija, l-Intraprenditorija u l-SMEs (DĠ GROW) huwa s-servizz tal-Kummissjoni Ewropea responsabbli mit-tlestija tas-suq intern għal prodotti u servizzi; jgħin lill-UE biex issir ekonomija intelliġenti, sostenibbli u inklużiva; għat-trawwim tal-intraprenditorija u t-tkabbir billi jitnaqqas il-piż amministrattiv fuq in-negozji ż-żgħar; għall-iffaċilitar tal-aċċess għall-finanzjament lill-intrapriżi żgħar u ta’ daqs medju (SMEs) u l-appoġġ għall-aċċess għas-swieq globali għall-kumpaniji tal-UE; u l-ħolqien ta’ politika dwar il-protezzjoni u l-infurzar tad-drittijiet tal-proprjetà industrijali, il-koordinazzjoni tal-pożizzjoni tal-UE u n-negozjati fis-sistema tad-drittijiet tal-proprjetà intellettwali (DPI), u l-assistenza lill-innovaturi dwar kif jużaw b’mod effettiv id-drittijiet tal-PI.

L-Aġenzija Eżekuttiva Ewropea għall-Kunsill Ewropew tal-Innovazzjoni u għall-SMEs (EISMEA) ġiet stabbilita fl-1 ta’ April 2021 bil-għan li tissaħħaħ l-innovazzjoni fis-suq uniku, billi jinħolqu sinerġiji qawwija biex jiġi appoġġat l-irkupru tal-ekonomija Ewropea u l-attivitajiet kollha tal-Kunsill Ewropew tal-Innovazzjoni (EIC) u l-programmi relatati mal-SMEs jiġu raggruppati f’Aġenzija waħda.

L-Aġenzija hija, tabilħaqq, responsabbli mill-iżvilupp u l-implimentazzjoni tal-Kunsill Ewropew tal-Innovazzjoni u tiġġestixxi programmi oħra tal-UE fl-oqsma tal-appoġġ għall-SMEs, l-ekosistemi tal-innovazzjoni, is-suq uniku, il-politika tal-konsumatur u l-investimenti interreġjonali fl-innovazzjoni. 

L-EEN ilu mill-2009 jikkoopera mal-EU-OSHA biex tiżdied is-sensibilizzazzjoni dwar l-OSH fost l-SMEs u l-mikrointrapriżi. Biex iwettaq dan il-kompitu, l-EEN jinnomina Ambaxxaturi fil-qasam tal-OSH fil-livell tal-pajjiż. Ir-rwol tagħhom jinkludi l-koordinazzjoni ta’ attivitajiet, il-promozzjoni tal-OSH għall-SMEs fil-livell nazzjonali u r-rappurtar lura lill-EU-OSHA darba fis-sena dwar l-attivitajiet ta’ OSH tagħhom.

Fl-2021, il-programm ġie estiż għal sitt pajjiżi mhux tal-UE (jiġifieri pajjiżi li jirċievu assistenza finanzjarja taħt l-Istrument tal-UE għall-Assistenza ta’ Qabel l-Adeżjoni (IPA): l-Albanija, il-Bożnija-Ħerzegovina, il-Montenegro, il-Maċedonja ta’ Fuq, is-Serbja u t-Turkija) u ġew innominati l-Ambaxxaturi tal-EEN fil-qasam tal-OSH taħt l-IPA.

Ara l-lista sħiħa tal-Ambaxxaturi tal-EEN fil-qasam tal-OSH

Fi ħdan is-CPP, ir-rwol tal-Grupp Ta’ Ħidma dwar is-Sħubiji ta’ Komunikazzjoni (Communication Partnership Working Group, CPWG), li huwa magħmul minn tliet punti fokali nazzjonali, tliet Ambaxxaturi tal-EEN fil-qasam tal-OSH u rappreżentanti tal-EU-OSHA, tad-DĠ GROW u tal-EIASME, huwa prinċipalment biex jipprovdi parir strateġiku u espert dwar l-implimentazzjoni u l-monitoraġġ tal-istrateġija tal-EU-OSHA dwar is-sħubiji ta’ komunikazzjoni.

Fil-qafas tal-Kampanja Postijiet tax-Xogħol li Jġibu ’l Quddiem is-Saħħa tal-aġenzija, l-għan tal-Premju għall-OSH tal-EEN huwa biex tiżdied is-sensibilizzazzjoni dwar l-OSH għall-SMEs u biex dan l-aspett jiġi promoss. Il-membri tal-EEN tas-27 Stat Membru, kif ukoll l-Iżlanda, il-Liechtenstein u n-Norveġja, u l-pajjiżi tal-IPA, huma mistiedna jressqu għal rikonoxximent kwalunkwe proġett tagħhom li għandu l-għan li jippromwovi s-saħħa u s-sigurtà b’mod aħjar fuq il-post tax-xogħol fl-SMEs u li jaqa’ taħt waħda mill-kategoriji li ġejjin: attivitajiet u avvenimenti li jippromwovu l-OSH; il-bini ta’ networks; u l-komunikazzjoni u pubblikazzjonijiet stampati u online.

2013 | 2014/15 | 2016/17 | 2018/19 | 2020/21 

Għodda elettronika hija biċċa softwer li tista’ taħdem fuq l-Internet, fuq kompjuter jew fuq telefown, tablet jew apparat elettroniku ieħor. L- ‘e’ — jiġifieri ‘elettronika’ — tagħmel distinzjoni bejn dawn l-għodod mill-għodod jew pubblikazzjonijiet tradizzjonali bbażati fuq il-karta.

L-għodod elettroniċi huma ‘interattivi’. Jeħtieġu xi dħul ta’ informazzjoni mil-utent, sew fl-għamla ta’ għarfien (pereżempju permezz tal-mili ta’ lista ta’ kontroll jew qasam ta' data) jew kejl tal-ambjent (pereżempju kejl tal-livelli ta’ ħoss jew dawl bi smartphone). Abbażi ta' dan l-input, l-għodda tipproduċi informazzjoni mfassla għall-utent (pereżempju billi tiggwida lill-utent permezz ta’ proċess ta’ teħid tad-deċiżjonijiet). F’dan is-sens, ‘għodda elettronika’ hija differenti minn strument statiku jew passiv bħal skeda informattiva tradizzjonali, lista ta’ kontroll jew gwida elettronika.

L-għodod elettroniċi tal-OSH għandhom jipprovdu appoġġ u/jew riżorsi lill-organizzazzjonijiet (b’mod partikolari l-MSEs, minħabba li spiss, dawn huma l-kumpaniji li jeħtieġu l-aktar dawn l-għodod) biex jgħinuhom jiġġestixxu r-riskji fuq il-post tax-xogħol. Madankollu, l-għodod elettroniċi jistgħu jiġu żviluppati għal firxa wiesgħa ta’ għanijiet, li jistgħu jkunu ġenerali ħafna u li japplikaw għal udjenza diversa jew ħafna aktar speċifiċi u mfassla apposta. Pereżempju:

• biex jgħinu fl-implimentazzjoni tal-leġiżlazzjoni tal-OSH (l-attur ewlieni tal-OSH biex jissodisfaw l-obbligi legali tagħhom);
• biex jgħinu jippromwovu kultura ta’ prevenzjoni (biex tiżdied is-sensibilizzazjoni, għal għanijiet ta’ informazzjoni);
• għal għanijiet ta’ taħriġ (pereżempju t-tagħlim elettroniku).

Għal organizzazzjonijiet jew utenti individwali, l-għodod elettroniċi tal-OSH:

• jagħtu s-setgħa lill-MSEs, billi jippermettu l-prevenzjoni tar-riskju tal-OSH internament;
• iħaffu n-negozju (data f’għamla elettronika tista’ tkun ikkommunikata u analizzata b’mod aktar faċli milli fuq il-karta);
• jgħinu fl-identifikazzjoni ta’ perikli u riskji fuq il-post tax-xogħol;
• iħaffu l-proċess ta’ valutazzjoni tar-riskji;
• juru s-soluzzjonijiet potenzjali għall-problemi tal-OSH;
• jappoġġjaw l-implimentazzjoni ta' miżuri preventivi fuq il-post tax-xogħol;
• huma faċli biex jintużaw, interattivi u faċli biex jiġu aċċessati.

B’differenza għal għodod ibbażati fuq il-karta, huwa possibbli li jiġi mmonitorjat l-użu ta’ għodda elettronika. Tista’ tikseb ukoll rispons dwar l-effikaċja u l-funzjonalità ta’ għodda elettronika. Barra minn hekk, ir-riżultati tal-għodod elettroniċi (pereżempju l-istatistika) jistgħu jintużaw bħala indikaturi tal-proġett u jipprovdu data anonima biex tiġi mmonitorjata l-prestazzjoni tal-politika tal-OSH.

Għal intermedjarji u dawk li jfasslu l-politika, l-għodod elettroniċi jaġixxu bħala strumenti ta' tqajjim ta’ sensibilizzazzjoni (pereżempju meta jintużaw fil-kuntest ta’ kampanja) u jistgħu jimmobilizzaw atturi (eż. imsieħba soċjali, spettorati).

Fl-aħħar nett, l-għodod elettroniċi huma attraenti għaż-żgħażagħ (ħaddiema, studenti), u, permezz ta’ diffużjoni u tixrid online (Internet u l-midja soċjali), jistgħu jilħqu udjenza diversa ħafna.

Hemm varjetà ta’ fatturi li jeħtieġu li jkunu kkunsidrati meta tiġi żviluppata għodda elettronika:

• Liema teknoloġija hija meħtieġa? L-ospitar, apparati multipli u sistemi operattivi, pereżempju, kollha għandhom jiġu kkunsidrati.
• X’inhuma l-ispejjeż tal-iżvilupp u tal-manutenzjoni? L-ispejjeż ta’ żvilupp tal-għodod elettroniċi huma ġeneralment baxxi meta mqabbla ma’ għodod ibbażati fuq il-karta (jiġifieri mhemmx spejjeż ta' stampar, ta’ distribuzzjoni jew ta’ ħażna). Madankollu, hekk kif tkun qiegħda tiġi żviluppata l-għodda, funzjonalitajiet ġodda (pereżempju aktar interattività) isiru aktar apparenti u l-iżvilupp ta’ dawn iżid l-ispiża u l-ħin għall-iżvilupp. Hemm ukoll spejjeż assoċjati mal-manutenzjoni u l-aġġornament tal-għodda elettronika.
• L-għodda se tkun applikazzjoni bbażata fuq l-Internet jew applikazzjoni fuq il-mobile? Xi għodod elettroniċi jistgħu jkunu ‘awtonomi’ fuq telefown u ma jeħtiġux konnessjoni mal-Internet, filwaqt li oħrajn jieħdu l-għamla ta’ sit web risponsiv, li jkun jeħtieġ konnessjoni mal-Internet. Huwa aktar faċli li jiġi evalwat is-suċċess ta’ siti web risponsivi milli l-applikazzjonijiet tal-mobile, iżda l-utent mhux dejjem jista' jkollu konnessjoni mal-Internet. Meta tiddeċiedi liema minn dawn l-approċċi tieħu, l-utent huwa l-konsiderazzjoni primarja.
• Minn għandu d-drittijiet tal-proprjetà? Ħafna drabi, f’dan il-qasam, jinħolqu nuqqas ta’ ċertezza u diffikultajiet.
• Ġew solvuti l-kwistjonijiet kollha relatati mad-drittijiet tal-awtur (pereżempju softwer, kontenut, ritratti)? Id-dritt tal-awtur fil-pubblikazzjonijiet fuq il-karta mhuwiex l-istess bħal dritt tal-awtur fuq l-għodod elettroniċi, u ħafna drabi għandhom jiġu kkonsultati avukati biex jgħinu fil-kjarifika ta’ dawn il-kwistjonijiet.

Għalkemm l-għodod elettroniċi jistgħu jkunu għaljin biex jiġu mantnuti u jinżammu aġġornati, billi jiġi kondiviż l-għarfien kif ukoll l-approċċi komuni, l-ispejjeż jistgħu jitnaqqsu.

L-EU-OSHA temmen li l-għodod elettroniċi tal-OSH għandhom rwol vitali biex jgħinuna nagħmlu l-postijiet tax-xogħol tagħna aktar siguri u li jibżgħu aktar għas-saħħa. Għalhekk, hija impenjata biex tistimula l-iżvilupp ta’ għodod elettroniċi tal-OSH u biex tappoġġja, tippromwovi u xxerred l-għodod elettroniċi eżistenti. L-EU-OSHA tiffoka fuq għodod elettroniċi tal-OSH ‘mhux għall-profitt’ u ‘mhux kummerċjali’ jew dawk li huma mingħajr ħlas għall-utent aħħari.

L-EU-OSHA tinvolvi ruħha fl-iżvilupp tal-għodda elettronika tal-OSH billi:

• tlaqqa’ flimkien il-partijiet ikkonċernati (żviluppaturi, promoturi, esperti, utenti) biex jiddiskutu l-bżonnijiet u l-isfidi;
• tikkondividi informazzjoni u għarfien dwar kif jiġu żviluppati l-għodod elettroniċi;
• tiskambja l-prattika tajba fir-rigward tal-iżvilupp tal-għodda elettronika;
• tidentifika sfidi fl-iżvilupp tal-għodda elettronika;
• tappoġġja laqgħat annwali;
• ixxerred informazzjoni dwar kif tagħmel l-għodod aktar trasferibbli.

L-EU-OSHA tappoġġja għodod eżistenti billi:

• tippromwovi l-għodod elettroniċi permezz ta’ artikli tal-OSHwiki;
• tinkoraġġixxi l-kondiviżjoni, l-adozzjoni u l-adattament ta’ għodod eżistenti minn istituzzjonijiet, organizzazzjonijiet u Stati Membri oħrajn;
• taġixxi bħala pjattaforma ta’ promozzjoni kooperattiva (jiġifieri l-għodod ikunu inklużi/promossi fi proġetti jew kampanji oħra).