Il-Belġju: Soluzzjonijiet diġitali biex jitnaqqsu r-riskji fil-produzzjoni tal-ħġieġ

AGC Glass Europe huwa grupp internazzjonali kbir tal-manifattura tal-ħġieġ ibbażat fil-Belġju. Bl-għan li tintlaħaq il-mira tal-ebda ħin mitluf minħabba korrimenti fl-impjanti kollha tiegħu, il-maniġment ilu sa mill-2022 jimplimenta sensiela ta’ soluzzjonijiet diġitali biex jaġġorna s-sistema ta’ sigurtà tiegħu. Pereżempju, software ġdid jiffaċilita l-ispezzjonijiet tas-sigurtà u l-ġestjoni tal-prodotti kimiċi. Kameras u sensuri intelliġenti jgħinu fil-prevenzjoni ta’ kolliżjonijiet ma’ tagħmir mobbli, u r-realtà virtwali tintuża fit-taħriġ dwar is-sigurtà. Qed jiġu esplorati wkoll metodi biex il-viżjoni tal-kompjuter ibbażata fuq l-IA tintrabat ma’ kameras ta’ sorveljanza għall-identifikazzjoni bikrija tal-perikli.

AGC huwa wieħed mill-eżempji mfaħħra tas-16-il kompetizzjoni tal-Premjijiet ta’ Prattika Tajba f’Postijiet tax-Xogħol Ħielsa mill-Periklu, li jirrikonoxxi l-prevenzjoni u l-ġestjoni b’suċċess tar-riskji marbuta mad-diġitalizzazzjoni fuq il-post tax-xogħol.