Sommarju - Fatturi ta’ riskju tal-kanċer okkupazzjonali fl-Ewropa – Ħarsa Ġenerali lejn is-sejbiet tal-Istħarriġ dwar l-Esponiment tal-Ħaddiema

L-Istħarriġ dwar l-Esponiment tal-Ħaddiema jidentifika esponiment probabbli għall-fatturi ta’ riskju tal-kanċer. Dan ir-rapport jistma li kważi nofs l-24,402 ħaddiema mistħarrġa f’sitt pajjiżi tal-UE kienu esposti għal mill-inqas wieħed minn dawn ir-riskji. Fl-aħħar ġimgħa tax-xogħol, 11 % iffaċċjaw esponiment ta’ livell għoli, u għal ċerti attivitajiet kien hemm riskju ta’ esponimenti multipli.

Għal kull fattur ta’ riskju, ir-rapport jagħti dettalji dwar iċ-ċirkostanzi ewlenin tal-esponiment, il-proporzjon ta’ ħaddiema affettwati, u l-użu ta’ miżuri ta’ kontroll (bħal tagħmir protettiv personali, ventilazzjoni u sistemi magħluqa).

L-użu ta’ miżuri ta’ kontroll ivarja ħafna. Id-differenzi fis-setturi u l-gruppi ta’ ħaddiema jindikaw li huma meħtieġa interventi mmirati u politiki mfassla apposta għal prevenzjoni aħjar.