Ir-Renju Unit — Il- "Programm dwar il-Benesseri" tan-Northumbrian Water Group

Northumbrian Water Group Limited (NWL) tforni u tiġġestixxi s-sistema tal-ilma mormi. Mill-forza tax-xogħol kollha, 30 % minnha għandha aktar minn 50 sena. - Assenza minħabba mard relatat ma' problemi muskuloskeletali u stress tiswa GBP 1 miljun fis-sena. Il-"Programm dwar il-Benesseri" tal-NWL għandu l-għan li jipprevjeni l-problemi tas-saħħa qabel ma dawn isiru kroniċi. Mill-2006, il-maniġers diretti ġew imħarrġa biex jidentifikaw kwistjonijiet relatati mal-impjegati, ikollhom diskussjonijiet xierqa u jagħmlu riferimenti għal servizzi disponibbli għall-impjegati skont il-Programm dwar il-Benesseri. . Mill-2008, RehabWorks ipprovdiet fiżjoterapija b'intervent bikri għall-impjegati, kemm jekk dawn ikunu ġew riferuti minnhom stess jew ikunu ġew riferuti mill-maniġer. Jintbagħtu rakkomandazzjonijiet lill-impjegatur u jintbagħat rapport lill-prattikant ġenerali tal-ħaddiema. It-tnaqqis tal-istress kien il-fokus tal-organizzazzjoni mill-2010, b'maniġers diretti mħarrġa biex jiġġestixxu sitwazzjonijiet sensittivi. Barra minn hekk, l-għoti ta' pariri kunfidenzjali jiġi pprovdut lill-impjegati/familji, fejn meħtieġ. Assenzi minħabba mard relatat ma' problemi muskuloskeletali naqsu b'40 % u assenzi minħabba l-mard relatat mal-istress naqsu b'13 %. Il-maniġment irrapporta li hemm impenn aħjar mill-impjegati. Fatturi ta' suċċess jinkludu l-involviment ta' partijiet ikkonċernati differenti fl-organizzazzjoni, inkluż id-dipartiment tar-riżorsi umani, ir-rappreżentanti ta' trade unions, il-maniġers diretti u l-ħaddiema, l-appoġġ estern u d-diversità tal-miżuri. Il-proċessi huma trasferibbli, b'mod partikolari fejn jeżistu l-programmi ta' assistenza għall-impjegati.