In-Norveġja — Il-politika dwar il-"Fażi tal-Ħajja" tal-Ajruport ta' Oslo

L-OSL tippossjedi u tmexxi l-ajruport ewlieni tan-Norveġja. B'500 impjegat, li l-età medja tagħhom hija ta' 46 sena u aktar minn 50 % jaħdmu bix-xift, l-OSL żviluppat il-politika dwar il-"Fażi tal-Ħajja" tagħhom biex tnaqqas l-assenza minħabba l-mard u d-diżabbiltà okkupazzjonali, filwaqt li żżomm ħaddiema tas-sengħa għal perjodu itwal. Ġie żviluppat programm tal-OSH għal ħaddiema ikbar fl-età inkluż attivitajiet għall-promozzjoni tas-saħħa, żvilupp tal-ħiliet/kompetenzi, ħinijiet tax-xogħol flessibbli u l-iżvilupp ta' programm tal-ġestjoni tar-riżorsi umani li jiffoka fuq it-tixjiħ u kwistjonijiet ta' matul il-ħajja. Għal dawk li għandhom iktar minn 50 sena, ġew implimentati monitoraġġi tas-saħħa, kontrolli regolari tas-saħħa u seminars dwar is-saħħa u l-ippjanar tal-karriera. Ġew introdotti x-xogħol flessibbli, aktar time-off kif ukoll trasferimenti jew taħriġ mill-ġdid. Ġew organizzati attivitajiet u korsijiet dwar il-promozzjoni tas-saħħa li kienu mmirati lejn in-nutrizzjoni, l-attività fiżika, it-tipjip u l-konsum tal-alkoħol. Bi sħubija mal-Università ta' Stavanger, il-maniġment jirċievi taħriġ dwar kwistjonijiet relatati ma' ħaddiema avvanzati fl-età. L-età medja tal-irtirar mix-xogħol tal-OSL żdiedet bi tliet snin (qabel iż-żieda mmirata tagħha ta' sitt xhur) u l-assenzi minħabba l-mard u n-numru ta' impjegati kklassifikati bħala medikament diżabbli naqsu. L-impjegati jirrappurtaw 90 % sodisfazzjon fl-impjieg tagħhom u l-OSL irċiviet rikonoxximent nazzjonali għall-politika ewlenija tagħha. Fatturi ta' suċċess jinkludu l-impenn tal-maniġment superjuri, koordinazzjoni tal-partijiet ikkonċernati, appoġġ estern u d-diversità tal-miżuri. Il-prinċipji ewlenin huma trasferibbli għal kwalunkwe kumpanija.