Il-prevenzjoni tad-disturbi muskoloskeletali u r-riskji psikosoċjali fuq il-post tax-xogħol: Strateġiji tal-UE u sfidi futuri

Ġabra kbira ta’ riċerka tindika implikazzjonijiet tax-xogħol fil-bidu ta’ disturbi muskoloskeletali relatati max-xogħol (MSDs). Aspetti individwali, fiżiċi, psikoloġiċi, soċjali u relatati max-xogħol kif ukoll fatturi oħra fuq il-post tax-xogħol u mhux okkupazzjonali jitqiesu li għandhom rwol fl-MSDs relatati max-xogħol. Matul iż-żmien, ir-riskji psikosoċjali assumew rilevanza dejjem tikber fl-istudju tad-determinanti tal-MSDs.

Hemm evidenza qawwija li l-fatturi psikosoċjali u dawk organizzazzjonali jgħollu r-riskju ta’ MSDs, speċjalment meta dawn ikunu kkombinati ma’ riskji fiżiċi. Dan id-dokument ta’ diskussjoni jagħti ħarsa ġenerali lejn il-prevalenza ta’ MSDs fl-Ewropa u janalizza l-każ tal-Italja, fejn ġie rreġistrat fenomenu li qed jikber ta’ MSDs fuq il-post tax-xogħol.

Id-dokument jiddeskrivi wkoll id-direttivi, l-istrateġiji u l-politiki tal-UE kif ukoll l-inizjattivi Ewropej li għandhom fil-mira l-prevenzjoni tal-MSDs relatati max-xogħol, bħall-kampanja 2020-2022 tal-EU-OSHA “Postijiet tax-Xogħol li Jġibu ’l Quddiem is-Saħħa Jħaffu l-Piż”. Dan id-dokument jikkonkludi billi jissottolinja l-ħtieġa għal approċċ integrat, olistiku u multidixxiplinari għall-ġestjoni u l-prevenzjoni tal-MSDs.