L-Awstrija - Il-programm "Fit for the Future"

Fl-2008, il-gvern Awstrijakk, flimkien mal-isħab soċjali nedew il-programm "Fit for the Future" (Fit für die Zukunft). "Fit for the Future" kellu l-għan li jżomm l-impjegabbiltà permezz tat-trawwim u l-preservazzjoni tal-kapaċità tax-xogħol, filwaqt li jnaqqas ukoll in-numru tal-pensjonijiet tal-invalidità.
Il-programm "Fit for the Future" kien żviluppat mill-AUVA (Allgemeine Unfallversicherungsanstalt – Il-Bord ta' Kumpens tal-Ħaddiema Awstrijaċi). 20 kumpanija ta' daqs differenti pparteċipaw, minn tmien setturi differenti (il-kostruzzjoni, il-kummerċ, il-metall, is-settur tal-lukandi, it-tindif/l-iskart, it-trasport, is-saħħa u l-post logistics). Il-programm jikkonsisti f'workshops ta' tqajjim ta' sensibilizzazzjoni, interventi fil-kumpaniji u disseminazzjoni ta' riżultati. Il-kooperazzjoni ma' organizzazzjonijiet tal-isħab soċjali kienet kritika fis-suċċess tal-programm.
Wara "Fit for the Future", minn Jannar 2013 ġie stabbilit netwerk nazzjonali ta' ċentri ta' konsulenza dwar is-saħħa okkupazzjonali. Din l-inizjattiva ġdida, imsejħa fit2work għandha l-għan li żżomm u li ttejjeb il-kapaċità tax-xogħol u tipprevjeni mard kroniku.