It-tieni edizzjoni tal-Aġenzija Ewropea għas-Sigurtà u s-Saħħa fuq il-Post tax-Xogħol (EU-OSHA) Stħarriġ Ewropew tal-Intrapriżi dwar ir-Riskji Ġodda u Emerġenti (ESENER-2) ġabret risponsi minn ftit inqas minn 50,000 intrapriża dwar il-ġestjoni u r-riskji fuq il-post tax-xogħol relatati mas-sigurtà u s-saħħa fuq il-post tax-xogħol (OSH), b'attenzjoni partikolari fuq il-parteċipazzjoni tal-ħaddiema u r-riskji psikosoċjali.
Għall-ewwel darba ġew inklużi, intrapriżi tal-agrikoltura u s-sajd u mikrointrapriżi li jħaddmu 5-10 impjegati. Il-mistoqsijiet ġew indirizzati lil dawk li kienu jafu l-aktar dwar il-ġestjoni tal-OSH fl-organizzazzjoni. Dawn wieġbu mistoqsijiet dwar il-fatturi ewlenin tar-riskju fl-intrapriżi tagħhom u rrapportaw dwar kif u għaliex jimmaniġġjawhom, filwaqt li identifikaw ukoll ostakli għall-prevenzjoni.
Ir-rapport Parteċipazzjoni tal-ħaddiema fil-ġestjoni tas-saħħa u s-sigurtà fuq il-post tax-xogħol: evidenza kwalitattiva mit-tieni Stħarriġ Ewropew tal-Intrapriżi dwar ir-Riskji Ġodda u Emerġenti (ESENER-2) jippreżenta s-sejbiet ta' studju kwalitattiv tar-rappreżentazzjoni tal-ħaddiema fuq l-OSH fl-Unjoni Ewropea, segwitu għal ESENER-2.
L-istudju jiffoka fuq ir-rappreżentazzjoni tal-interessi tal-ħaddiema fis-saħħa u s-sigurtà kif esperjenzati mir-rappreżentanti nfushom, mill-impjegati li jaħdmu magħhom u mill-impjegaturi u l-maniġers tagħhom. Dan huwa bbażat fuq intervisti fil-fond ma' dawn il-parteċipanti f'143 stabbiliment differenti f'seba' Stati Membri tal-UE: Il-Belġju, l-Estonja, il-Greċja, in-Netherlands, Spanja, l-Iżvezja u r-Renju Unit.
Il-maġġoranza l-kbira ta' dawn il-każijiet huma stabbilimenti li ġew mistħarrġa fl-ESENER-2. Dawn inkisbu b'mod ugwali minn tliet setturi ewlenin (is-settur tal-produzzjoni privat, is-settur pubbliku u s-settur tas-servizzi privat) u tliet klassijiet ta' daqs (żgħar, medji u kbar). L-analiżi ġiet appoġġjata b'rieżami tal-letteratura u intervisti addizzjonali mal-informanti f'organizzazzjonijiet ewlenin, kif ukoll minn analiżi kwantitattiva ulterjuri tad-data ta' ESENER-2 rilevanti.