Stress - definizzjoni u sintomi

Definizzjoni u kawżi

Għalkemm l-esperjenza ta' stress hija psikoloġika, l-istress jolqot ukoll is-saħħa fiżika tal-bniedem.

Fatturi komuni fl-istress relatat max-xogħol jinkludu nuqqas ta' kontroll fuq ix-xogħol, talbiet mhux xierqa li qed isiru lill-ħaddiema, u nuqqas ta' appoġġ mill-kollegi u mit-tmexxija.

L-istress huwa kkawżat minn korrispondenza skarsa bejn ix-xogħol u l-ħaddiem, mir-relazzjonijiet ħżiena u l-preżenza ta' vjolenza psikoloġika jew fiżika fuq post tax-xogħol, u permezz ta' kunflitti bejn ir-rwoli tagħna fuq ix-xogħol u dawk li huma barra mix-xogħol. 

Ir-reazzjonijiet għall-istess ċirkostanzi jvarjaw bejn l-individwi. Uħud jistgħu jkampaw aħjar minn ħaddieħor meta jkunu suġġetti għal stress. L-importanti hija l-evalwazzjoni suġġettiva mill-individwu tas-sitwazzjoni tiegħu. Mhux possibbli li mis-sitwazzjoni biss jiġi ddeterminat l-livell ta' stress li tista' tikkawża.

Sintomi ta' stress relatati max-xogħol

L-esperjenza ta' stress tista' tbiddel il-mod ta' kif persuna tħoss, taħseb u ġġib ruħha. Is-sintomi jinkludu:

Fuq livell ta' organizzazzjoni:

• assenteiżmu, ħafna tibdil ta' ħaddiema, nuqqas fil-kontroll fil-ħinijiet tax-xogħol, problemi dixxiplinarji, fastidju, nuqqas ta' produttività, inċidenti, żbalji u żieda fil-prezz tal-kumpens jew ta' l-ispejjeż mediċi.

Fuq livell individwali:

• reazzjonijiet emottivi (irritabbiltà, ansjetà, problemi ta' rqad, depressjoni, ipokondrija, aljenazzjoni, eżawriment u problemi fir-relazzjonijiet mal-familja);
• reazzjonijiet konjittivi (diffikultà fil-konċentrazzjoni, fil-memorja, fit-tagħlim ta' affarijiet ġodda u fit-teħid ta' deċiżjonijiet);
• reazzjonijiet li għandhom x'jaqsmu ma' l-imġiba (abbuż ta' drogi, alkoħol, u tabakk; imġiba distruttiva), u
• reazzjonijiet fiżjoloġiċi (problemi fid-dahar, djgħufija tas-sistema immunitarja, ulċeri peptiċi, problemi tal-qalb, u ipertensjoni).