Postijiet tax-xogħol aktar sikuri u mingħajr periklu għas-saħħa permezz ta’ manutenzjoni adegwata

Il-manutenzjoni regolari għandha rwol importanti sabiex jiġu eliminati l-perikli minn fuq il-post tax-xogħol u sabiex jiġu pprovduti kundizzjonijiet tax-xogħol aktar sikuri u mingħajr periklu għas-saħħa. In-nuqqas ta’ manutenzjoni jew manutenzjoni mhux adegwata jistgħu jikkawżaw inċidenti serji u fatali jew problemi ta’ saħħa.

L-inċidenti jseħħu minħabba installazzjonijiet elettriċi difettużi (kejbils, plaggs, tagħmir)

• xokkijiet u ħruq, nirien, tqabbid ta’ atmosferi potenzjalment splussivi jew li jistgħu jieħdu n-nar

L-inċidenti jseħħu minħabba li t-tagħmir tal-irfigħ ma jiġix spezzjonat u ma ssirlux manutenzjoni regolari

• il-ktajjen tal-irfigħ ikunu maħmuġin/imsadda u mhux b’saħħithom biżżejjed, li jikkawżaw tagħbijiet tqal biex jaqgħu

L-inċidenti jseħħu bħala riżultat ta’ nuqqas ta’ manutenzjoni tal-uċuh tax-xogħol u tal-mixi u tar-rotot tat-traffiku

• uċuh irregolari, bil-ħofor, imżerżqa jew jiżolqu jikkawżaw waqgħat, żelqiet u inċidenti ta’ trakkijiet fork-lifters

It-trab jikkawża riskju potenzjali għas-saħħa għall-ħaddiema li jaħdmu fl-industrija tax-xogħol tal-injam u fil-barrieri.

Il-manutenzjoni tat-tagħmir li jikkontrolla t-trab hija kruċjali fil-proċessi kollha li jipproduċu t-trab sabiex tiġi evitata l-espożizzjoni tal-ħaddiema għat-trab

• il-katusi tal-ventilazzjoni għandhom jinżammu ħielsa minn oġġetti li jsoddu u jissewwew jekk issirilhom il-ħsara
• l-unitajiet tal-filters jeħtieġ li ssirilhom manutenzjoni regolari skont ir-rakkomandazzjonijiet tal-manifattur

Il-manutenzjoni hija attività b’riskju għoli

Perikli u riskji speċifiċi għall-manutenzjoni

Minbarra r-riskji assoċjati ma’ kwalunkwe ambjent tax-xogħol, l-operazzjonijiet ta’ manutenzjoni jinvolvu xi riskji speċifiċi. 

Dawn jinkludu xogħol flimkien ma’ proċess ta’ tmexxija u f’kuntatt mill-qrib mal-makkinarju. Matul l-operat normali, l-awtomatizzazzjoni tipikament tnaqqas il-probabbiltà ta’ żball uman li jista’ jwassal għal inċidenti. F’attivitajiet ta’ manutenzjoni, kuntrarju għall-operat normali, il-kuntatt dirett bejn il-ħaddiem u l-magna ma jistax jitnaqqas b’mod sostanzjali – il-manutenzjoni hija attività fejn il-ħaddiema jeħtieġ li jkunu f’kuntatt mill-qrib mal-proċessi.

Il-manutenzjoni ta’ spiss tinvolvi xogħol mhux tas-soltu, kompiti mingħajr rutina u spiss titwettaq f’kundizzjonijiet eċċezzjonali, bħal ħidma fi spazji limitati.

L-operazzjonijiet ta’ manutenzjoni tipikament jinkludu kemm iż-żarmar kif ukoll l-armar, li ta’ spiss ikunu jinvolvu makkinarju kkumplikat. Dan jista’ jkun assoċjat ma’ riskju akbar ta’ żball uman, li jżid ir-riskju tal-inċidenti.

Il-manutenzjoni tinvolvi ambjent tax-xogħol u kompiti li jinbidlu. Dan huwa veru b’mod speċjali fil-każ ta’ ħaddiema bil-kuntratt. Is-subkuntrattar huwa fattur aggravanti f’termini ta’ saħħa u sigurtà – għadd numeruż ta’ aċċidenti u inċidenti huma relatati mal-manutenzjoni subkuntrattata.

Ix-xogħol taħt pressjoni ta’ ħin huwa wkoll tipiku għal operazzjonijiet ta’ manutenzjoni, speċjalment meta jkunu involuti tiswijiet ta’ prijorità għolja jew ta’ għeluq ta’ sistemi.

Perikli, riskji u eżiti tas-saħħa

Minħabba li l-manutenzjoni titwettaq fis-setturi u l-postijiet tax-xogħol kollha u tinvolvi firxa wiesgħa ta’ kompiti, hija assoċjata ma’ varjetà kbira ta’ perikli.

Perikli fiżiċi

• storbju, vibrazzjoni
• sħana u kesħa eċċessiva
• radjazzjoni (radjazzjoni ultravjola, raġġi x, kampijiet elettromanjetiċi)
• xogħol fiżiku iebes
• riskji relatati mal-ergonomija: minħabba d-disinn ħażin tal-makkinarju, tal-proċess u tal-ambjent tax-xogħol mill-perspettiva tal-manutenzjoni, huwa diffiċli li jintlaħqu l-oġġetti li trid issirilhom il-manutenzjoni - movimenti ta’ strapazz (liwi, pożizzjoni fuq l-irkupptejn, ilħuq, imbuttar u tiġbid, ħidma fi spazji limitati)

:: Kompiti tipiċi:

• tħaffir, grinding, illimar, xkatlar
• ħidma fuq barra, manutenzjoni ta’ impjanti industrijali (eż. fran u postijiet bi sħana kbira, unitajiet ta’ tkessiħ)
• iwweldjar, spezzjoni ta’ pajpijiet, manutenzjoni tal-linji tal-ferroviji

:: Eżiti tas-saħħa potenzjali: problemi ta’ smigħ minħabba l-istorbju, disturbi muskuloskeletali

Perikli kimiċi

• Asbestos, fibri tal-ħġieġ
• Fwar, dħaħen, trab (eż. dħaħen tal-asfalt, egżost tad-diżil, silika kristallina)
• Solventi

:: Kompiti tipiċi

• manutenzjoni tal-bini
• iwweldjar bl-ark elettriku
• it-twettiq ta’ xogħol fi spazji limitati
• xogħol fi ħwienet fejn isiru tiswijiet ta’ karozzi
• manutenzjoni ta’ installazzjonijiet industrijali fejn ikun hemm il-preżenza ta’ sustanzi kimiċi perikolużi

:: Eżiti tas-saħħa potenzjali: problemi respiratorji, ażżma okkupazzjonali, allerġiji, asbestożi, kanċer

Perikli bijoloġiċi

• Batterja (eż. leġjonella, salmonella)
• Moffa u fungi

:: Kompiti tipiċi :

• manutenzjoni f’impjanti ta’ trattament tal-iskart
• manutenzjoni f’postijiet fejn jiġu ttrattati aġenti bijoloġiċi bħal laboratorji
• manutenzjoni f’postijiet fejn il-batterja, il-moffa u l-fungi x’aktarx li joktru u jirriproduċu, bħal sistemi ta’ kondizzjonar tal-arja

:: Eżiti tas-saħħa potenzjali: problemi respiratorji, ażżma, allerġiji, il-marda tal-Leġjonella

Fatturi ta’ riskji psikosoċjali

• Pressjoni ta’ ħin
• Xogħol bix-xift, xogħol fi tmiem il-ġimgħa, xogħol bil-lejl, xogħol on-call u sigħat tax-xogħol irregolari
• Ħidma flimkien ma’ persunal minn kuntratturi / diversi kuntratturi – kwistjonijiet ta’ komunikazzjoni

:: Eżiti tas-saħħa potenzjali: stress relatat max-xogħol, għejja, riskju akbar ta’ inċidenti

Riskju għoli ta’ kull tip ta’ inċidenti

• Ħafna inċidenti huma relatati ma’ manutenzjoni ta’ magni u tagħmir tax-xogħol, eż. tgħaffiġ minn makkinarju li jiċċaqlaq, makkinarju li jinxtegħel bla mistenni
• Waqgħat mill-għoli, inċidenti li jinvolvu oġġetti li jaqgħu
• Mewta b'xokk elettriku, xokkijiet elettriċi, ħruq
• Spazji limitati, qtugħ ta’ nifs
• Splużjoni, nirien

Fatti u figuri

L-analiżi tad-dejta tal-EUROSTAT ibbażata fuq il-metodoloġija ESAW (statistika Ewropea dwar l-inċidenti fuq ix-xogħol) tista’ tgħin sabiex jiġu identifikati inċidenti relatati ma’ operazzjonijiet ta’ manutenzjoni f’diversi pajjiżi Ewropej.

Huwa stmat li madwar 15-20% (skont il-pajjiż) tal-inċidenti kollha u 10-15% tal-inċidenti fatali kollha huma relatati ma’ operazzjonijiet ta’ manutenzjoni.

Il-manutenzjoni, it-tiswija u l-aġġustament tat-tuning jinsab ir-raba’ fuq il-lista tal-aktar 10 proċessi tax-xogħolli jammontaw għall-ogħla numru ta’ inċidenti fatali matul l-2003-05 (EUROSTAT-ESAW).

L-inċidenti qegħdin ikollhom it-tendenza li jsiru dejjem aktar mhux waqt operazzjoni normali, iżda aktar waqt tiswija, manutenzjoni, tindif, aġġustament, eċċ..

Skont stħarriġ li sar fl-2005 fi Franza, il-manutenzjoni hija l-aktar funzjoni sottokuntrattata fl-industrija. Analiżi ta’ database Franċiża dwar l-inċidenti fuq il-post tax-xogħol turi li fl-2002, l-impjegati tal-manutenzjoni kienu t-tieni l-aktar vittmi frekwenti ta’ inċidenti relatati mas-subkuntrattar, eżattament wara l-ħaddiema fil-qasam tal-kostruzzjoni.

Analiżi tar-riżultati tal-Istħarriġ Nazzjonali Spanjol tal-Kundizzjonijiet tax-Xogħol (2007) tindika espożizzjoni ogħla tal-ħaddiema tal-manutenzjoni għall-istorbju u għal vibrazzjonijiet fid-dirgħajn u fil-ġisem kollu meta mqabbla ma’ ħaddiema oħrajn. Dawn huma wkoll aktar esposti għal sustanzi perikolużi, fwar u dħaħen.

Madwar 25% tal-inċidenti kollha ta’ korrimenti minn ħsara elettrika huma kkawżati minn tagħmir elettriku li jista’ jinġarr minn post għal ieħor. Difetti fit-tagħmir jikkawżaw madwar 2000 każ ta’ nirien kull sena. Kawża prinċipali ta’ dawn l-inċidenti u nirien hija n-nuqqas ta’ twettiq ta’ spezzjonijiet u manutenzjoni (HSE).

Aqra r-rapport tagħna u l-folja ta' fatti  tagħnaIl-Manutenzjoni u l-OHS – Stampa statistika

Regoli bażiċi biex l-affarijiet isiru sew

Id-dettalji speċifiċi tal-manutenzjoni jvarjaw bejn is-setturi tal-industrija u skont il-kompiti. Iżda hemm xi prinċipji komuni:

• L-integrazzjoni tal-ġestjoni tal-OHS fil-ġestjoni tal-manutenzjoni
• Approċċ strutturat ibbażat fuq valutazzjoni tar-riskji
• Rwoli u responsabbiltajiet ċari
• Sistemi sikuri tax-xogħol u linji gwida ċari biex jiġu segwiti
• Taħriġ u kompetenza adegwati
• L-involviment tal-ħaddiema fil-valutazzjoni tar-riskji u fil-proċess tal-ġestjoni tal-manutenzjoni
• Komunikazzjoni effettiva

Ħames regoli bażiċi għal manutenzjoni mingħajr periklu

1. Ippjanar
   
   
2. Kif tagħmel iż-żona tax-xogħol mingħajr periklu
   
   
3. L-użu tat-tagħmir addattat
   
   
4. Ħidma kif ippjanata
   
   
5. Kontroll finali

1. Ippjanar

Il-manutenzjoni għandha tibda b’ippjanar xieraq. Għandha titwettaq valutazzjoni tar-riskji u l-ħaddiema għandhom jiġu involuti f’dan il-proċess. Kwistjonijiet li għandhom jiġu koperti fl-istadju tal-ippjanar huma:

Dawk li jħaddmu jeħtieġ li jiżguraw li l-ħaddiema jkollhom il-ħiliet li jeħtieġu sabiex iwettqu l-kompiti neċessarji, ikunu informati dwar proċeduri tax-xogħol sikuri, u jkunu jafu x’għandhom jagħmlu meta sitwazzjoni teċċedi l-kompetenza tagħhom. Dawk li jħaddmu għandu jaħsbu bir-reqqa dwar il-'katina ta' kmand' fost dawk li huma involuti f’kompitu ta’ manutenzjoni, u kwanlunkwe proċeduri li sejrin jintużaw għat-tul tal-attività, inklużi proċeduri ta’ rappurtaġġ jekk ikun hemm xi problema. Dan huwa importanti b’mod speċjali jekk il-manutenzjoni titwettaq minn subkuntratturi.

Huwa vitali li l-ħaddiema jiġu kkonsultati u jinżammu informati matul l-istadju kollu tal-ippjanar. L-impjegati li jwettqu kompitu ta’ manutenzjoni għandhom mhux biss jiġu informati dwar l-eżiti tal-valutazzjoni tar-riskji, iżda huma għandhom ikunu wkoll involuti fiha. Minħabba l-familjarità tagħhom mal-post tax-xogħol, dawn ta’ spiss ikunu fl-aħjar pożizzjoni biex jidentifikaw il-perikli u l-aktar modi effiċjenti sabiex jindirizzawhom. Il-parteċipazzjoni tal-ħaddiema’ fil-proċess tal-ippjanar iżżid mhux biss is-sigurtà tax-xogħol tal-manutenzjoni, iżda wkoll il-kwalità tiegħu.

2. Kif tagħmel iż-żona tax-xogħol mingħajr periklu

Iż-żona tax-xogħol jeħtieġ li tiġi assigurata permezz tal-prevenzjoni tal-aċċess mhux awtorizzat, pereżempju, billi jintużawbarrikati u sinjali. Huwa meħtieġ ukoll li ż-żona tinżamm nadifa u sikura, bil-power ma jistax jintmess, il-partijiet li jiċċaqilqu tal-makkinarju jiġu assigurati, tiġi installata ventilazzjoni temporanja, u jiġu stabbiliti rotot sikuri sabiex il-ħaddiema jkunu jistgħu jidħlu u joħorġu miż-żona fejn ikun qiegħed isir ix-xogħol. Mal-makkinarju għandhom jitwaħħlu karti ta' twissija bid-data u l-ħin tal-lock-off, kif ukoll l-isem tal-persuna awtorizzata biex tneħħi l-lokk – b’dan il-mod, is-sigurtà tal-ħaddiem li jwettaq il-manutenzjoni fuq il-magna ma tiġix ipperikolata minn xi ħaddiem ieħor li jixgħelha involontarjament.

Jekk possibbli, għandu jiġi ddisinjat ilqugħ sabiex jippermetti li ssir manutenzjoni minuri mingħajr ma jitneħħew is-salvagwardji. Jekk l-ilqugħ għandu jitneħħa jew ma jibqax attivat, imbagħad għandhom jiġu segwiti proċeduri ta’ lock-off. Il-ħaddiema u l-operaturi tal-manutenzjoni għandhom ikunu mħarrġa fuq kif u taħt liema kundizzjonijiet jistgħu jitneħħew is-salvagwardji.

3. L-użu tat-tagħmir addattat

Il-ħaddiema involuti f’kompiti ta’ manutenzjoni għandu jkollhom l-għodda u t-tagħmir xierqa, li jistgħu jkunu differenti minn dawk li jużaw normalment. Meta wieħed iqis li dawn jistgħu jkunu qegħdin jaħdmu f’żoni li mhumiex iddisinjati biex ikollhom nies jaħdmu fihom, u li dawn jistgħu jkunu esposti għal firxa varjata ta’ perikli, huma għandu jkollhom ukoll tagħmir protettiv personali xieraq.

Fir-rigward tat-tagħmir u l-għodod li għandhom jintużaw, dawk li jħaddmu għandhom jiżguraw li:

It-tagħmir protettiv personali għandu:

Pereżempju, ħaddiema li jnaddfu jew ibiddlu filters f’ventilazzjoni ta’ estrazzjoni jistgħu jkunu esposti għal konċentrazzjonijiet ta’ trab li jkunu ferm ogħla min-normali għal post tax-xogħol partikolari. L-aċċess għal dawn il-filters, li ħafna drabi jkunu jinsabu fiż-żona tas-saqaf, għandu jsir ukoll b’tali mod li ma jkunx perikoluż.

4. Ħidma kif ippjanata

Il-proċeduri tax-xogħol sikuri għandhom jiġu kkomunikati, jinftiehmu mill-ħaddiema u s-sorveljaturi u jiġu applikati kif suppost. Ix-xogħol għandu jiġi mmonitorjat sabiex ikun żgurat li jiġu osservati r-regoli tas-siti u s-sistemi tax-xogħol sikuri li jintlaħaq qbil dwarhom. Il-manutenzjoni ta’ spiss issir taħt pressjoni – pereżempju meta xi ħsara li tinqala’ twassal biex il-proċess tal-produzzjoni jieqaf. Jeħtieġ li jiġu segwiti proċeduri sikuri, anki meta jkun hemm pressjoni ta’ ħin: tentattivi ta’ ffrankar tax-xogħol jistgħu jiswew ħafna aktar jekk iwasslu għal inċidenti, korrimenti jew ħsara fi proprjetà.

Jeħtieġ li l-proċeduri jkunu fis-seħħ għal avvenimenti mhux mistennija. Parti mis-sistema sikura tax-xogħol għandha tkun li x-xogħol jitwaqqaf f’każ li tinqala’ xi problema mhux mistennija jew problema li taqbeż il-kompetenza tal-persuna kkonċernata’. Huwa importanti ħafna li wieħed jiftakar li jekk jaqbeż l-ambitu tal-ħiliet u l-kompetenza tiegħu jista’ joħloq inċidenti’.

5. It-twettiq ta’ kontrolli finali

Il-proċess tal-manutenzjoni jeħtieġ li jispiċċa bit-twettiq ta’ kontrolli sabiex ikun żgurat li l-kompitu tlesta, li l-oġġett li ssirlu l-manutenzjoni huwa f’kundizzjoni sikura, u li kull materjal ta’ skart li ġie ġġenerat matul il-proċess tal-manutenzjoni tnaddaf u tneħħa. Meta kollox ikun ġie ċċekkjat u ddikjarat bħala li ma fihx periklu, imbagħad il-kompitu jkun jista’ jiġi ffirmat bħala mitmum, u s-sorveljaturi u ħaddiema oħrajn jiġu nnotifikati dwar dan.

Il-pass finali jinvolvi t-tlestija ta’ rapport, li jiddeskrivi l-ħidma li twettqet u jinkludi kummenti dwar kwalunkwe diffikultà li tkun inqalgħet, flimkien ma’ rakkomandazzjonijiet għal titjib. Idealment, dan għandu jiġi diskuss ukoll waqt laqgħa tal-persunal fejn il-ħaddiema involuti fil-proċess, kif ukoll dawk li jaħdmu madwarhom, ikunu jistgħu jikkummentaw dwar l-attività tal-manutenzjoni u joħorġu b’suġġerimenti xierqa biex itejbu l-proċess.

leġiżlazzjoni Ewropea dwar il-manutenzjoni

Sa mis-sena 1989, ġew adottati għadd ta’ direttivi Ewropej, li jistabbilixxu qafas ġenerali ta’ rekwiżiti minimi għall-ħarsien tal-ħaddiema fuq il-post tax-xogħol.

Dawn id-direttivi japplikaw ukoll għal attivitajiet ta’ manutenzjoni, l-ewwel u qabel kollox id-direttiva ta’ qafas, inkluż l-obbligu għal dawk li jħaddmu li jwettqu valutazzjoni tar-riskju fuq il-post tax-xogħol.

Direttiva tal-Kunsill 89/391 - "Direttiva ta' Qafas" dwar il-prinċipji ġenerali li jikkonċernaw il-prevenzjoni u l-ħarsien tal-ħaddiema kontra mard u inċidenti relatati max-xogħol

Din tinkludi l-prinċipji ġenerali tal-prevenzjoni, tistabbilixxi l-obbligi’ ta’ dawk li jħaddmu rigward il-valutazzjoni tar-riskji, l-eliminazzjoni tar-riskji u l-fatturi tal-inċidenti, l-informar, il-konsultazzjoni u l-parteċipazzjoni u t-taħriġ bilanċjati tal-ħaddiema u r-rappreżentanti tagħhom.

Il-Kummissjoni Ewropea pproduċiet Gwida dwar il-valutazzjoni tar-riskji fuq il-post tax-xogħol sabiex tgħin lil dawk li jħaddmu u lill-impjegati biex jimplimentaw ir-rekwiżiti tal-valutazzjoni tar-riskji tad-Direttiva ta’ Qafas 89/391/KEE. F’din il-gwida, il-ħaddiema tal-manutenzjoni kienu identifikati bħala “ħaddiema li jistgħu jkunu f’riskju akbar”. Il-gwida tenfasizza wkoll il-ħtieġa li titwettaq valutazzjoni tar-riskju separata għall-attivitajiet ta’ manutenzjoni.

Fuq il-bażi tad-"Direttiva ta’ Qafas" ġew adottati serje ta’ direttivi individwali, kollha rilevanti għat-twettiq tal-manutenzjoni mingħajr periklu u li ħafna minnhom jinkludu dispożizzjonijiet speċifiċi rigward attivitajiet ta’ manutenzjoni u rekwiżiti għal manutenzjoni sabiex jiġu eliminati l-perikli minn fuq il-post tax-xogħol.

Id-Direttiva tal-Kunsill 89/654/KEE

dwar il-ħtiġijiet minimi tas-saħħa u s-sigurtà fuq il-post tax-xogħol tinkludi, fost l-oħrajn, il-ħtieġa li dawk li jħaddmu jiżguraw li

• ir-rotot tat-traffiku għal ħruġ ta’ emerġenza u t-toroq infushom minn fejn isir il-ħruġ jinżammu ħielsa minn kull ostakolu l-ħin kollu
• titwettaq il-manutenzjoni teknika tal-post tax-xogħol u tat-tagħmir u l-apparat u li kwalunkwe ħsarat li jinstabu li huma responsabbli li jaffettwaw is-saħħa u s-sigurtà tal-ħaddiema jiġu msewwija mill-aktar fis possibbli
• l-apparat u t-tagħmir tas-sigurtà intiżi biex jipprevjenu jew jeliminaw il-perikli jiġu ċċekkjati u ssirilhom manutenzjoni regolari

Id-Direttiva tal-Kunsill 89/655/KEE

dwar il-ħtiġijiet minimi tas-saħħa u s-sigurtà fl-użu tat-tagħmir tax-xogħol mill-ħaddiema fuq il-post tax-xogħol, filwaqt li l-użu tat-tagħmir tax-xogħol jikkomprendi manutenzjoni u servicing, inkluż, b’mod partikolari, tindif, tistipula li

• min iħaddem għandu jieħu l-miżuri meħtieġa sabiex jiżgura li, sakemm idum jaħdem u jservi, it-tagħmir tax-xogħol jinżamm, permezz ta’ manutenzjoni adegwata, f’tali livell li jkun konformi mad-dispożizzjonijiet tal-paragrafu 1 (a) jew (b) kif applikabbli.
• min iħaddem għandu jiżgura li t-tagħmir tax-xogħol espost għal kundizzjonijiet li jikkawżaw deterjorazzjoni li tista’ tirriżulta f’sitwazzjonijiet perikolużi huwa soġġett għal:

- spezzjonijiet perjodiċi u spezzjonijiet speċjali sabiex jiġi żgurat li l-kundizzjonijiet tas-saħħa u s-sigurtà jiġu mħarsa u li d-deterjorazzjoni tkun tista’ tiġi skoperta u rrimedjata fil-ħin

• meta l-użu tat-tagħmir tax-xogħol x’aktarx li jinvolvi riskju speċifiku għas-saħħa u s-sigurtà tal-ħaddiema, min iħaddem għandu jiżgura li:

- - l-użu tat-tagħmir tax-xogħol ikun ristrett għal dawk il-persuni li jingħataw il-kompitu li jużawh;
- fil-każ ta’ tiswijiet, modifikazzjonijiet, manutenzjoni jew għoti ta' servis, il-ħaddiema kkonċernati huma speċifikament magħżula biex iwettqu xogħol bħal dan.

Id-direttiva tinkludi wkoll ħtieġa minima għat-tagħmir ta' kontroll u protezzjoni u dispożizzjonijiet li jikkonċernaw il-manutenzjoni:

• għandu jkun possibbli li jitwettqu operazzjonijiet ta’ manutenzjoni meta t-tagħmir ikun mitfi. Jekk dan ma jkunx possibbli, għandu jkun possibbli li jittieħdu miżuri ta’ protezzjoni għat-twettiq ta’ operazzjonijiet bħal dawn jew għal tali operazzjonijiet li għandhom jitwettqu barra miż-żoni ta’ periklu
• jekk magna jkollha log tal-manutenzjoni, dan għandu jinżamm aġġornat
• il-ħaddiema għandu jkollhom mezzi sikuri ta' aċċess għal, u jkunu kapaċi jżommu ‘l bogħod minn kull periklu, fiż-żoni kollha li huma meħtieġa għall-operazzjonijiet tal-produzzjoni, l-aġġustament u l-manutenzjoni.

Barra minn hekk, hija tinkludi dispożizzjonijiet rigward l-użu ta’ tagħmir tax-xogħol ipprovdut għal xogħol temporanju fl-għoli, eż. dispożizzjonijiet speċifiċi rigward l-użu ta’ slielem, scaffolding.

Id-Direttiva tal-Kunsill 89/656/KEE

dwar il-ħtiġijiet minimi tas-saħħa u s-sigurtà għall-użu ta’ tagħmir ta’ protezzjoni personali mill-ħaddiema fuq il-post tax-xogħol tistipula li t-tagħmir ta’ protezzjoni personali għandu jiġi pprovdut mingħajr ħlas minn min iħaddem, li għandu jiżgura li dan ikun jaħdem tajjeb u f'kundizzjoni iġjenika sodisfaċenti permezz tal-manutenzjoni, it-tiswija u t-tibdiliet meħtieġa.

ANNESS III għad-direttiva jipprovdi lista gwida mhux eżawrjenti ta’ attivitajiet u setturi ta’ attività li jistgħu jeħtieġu l-forniment ta’ tagħmir ta’ protezzjoni personali.

Id-Direttiva tal-Kunsill 92/91/KEE

li tikkonċerna l-ħtiġijiet minimi għat-titjib tal-ħarsien tas-saħħa u s-sigurtà tal-ħaddiema fl-industriji tal-estrazzjoni tal-minerali permezz tat-tħaffir

Tinkludi, fost l-oħrajn, ħtiġijiet minimi applikabbli għas-setturi on-shore u off-shore, inklużi dispożizzjonijiet dwar il-manutenzjoni.

Id-Direttiva tal-Kunsill 92/104/KEE

dwar il-ħtiġijiet minimi għat-titjib tal-ħarsien tas-saħħa u s-sigurtà tal-ħaddiema fl-industriji tal-estrazzjoni tal-minerali kemm fuq, kif ukoll taħt l-art

Min iħaddem għandu jieħu l-miżuri meħtieġa sabiex jiżgura li:

• l-postijiet tax-xogħol jiġu ddisinjati, mibnija, mgħammra, ikkummissjonati, mħaddma u miżmuma b’tali mod li l-ħaddiema jkunu jistgħu jwettqu x-xogħol assenjat lilhom mingħajr ma jpoġġu s-saħħa u/jew is-sigurtà tagħhom u/jew ta’ ħaddiema oħrajn fil-periklu;
• ix-xogħol li jinvolvi riskju speċjali jiġi fdat biss lil persunal kompetenti u jitwettaq skont l-istruzzjonijiet li jingħataw.

Id-Direttiva tal-Kunsill 93/103/KE

dwar il-ħtiġijiet minimi tas-saħħa u s-sigurtà għal xogħol abbord bastimenti tas-sajd tistipula li l-Istati Membri għandhom jieħdu l-miżuri meħtieġa sabiex jiżguraw li s-sidien:

• jiżguraw li l-bastimenti u l-fittings tagħhom jinżammu f’kundizzjoni teknikament tajba u li d-difetti li jinstabu jissewwew mill-aktar fis possibbli

Id-Direttiva tal-Kunsill 98/24/KE

dwar il-protezzjoni tas-saħħa u s-sigurtà tal-ħaddiema mir-riskji relatati mal-aġenti kimiċi fuq il-post tax-xogħol tistipula li l-manutenzjoni, li hija assoċjata ma’ potenzjal għal espożizzjoni sinjifikanti jew li tista’ tirriżulta f’effetti ta’ ħsara għas-saħħa u s-sigurtà għal raġunijiet oħrajn, għandha tiġi inkluża fil-valutazzjoni tar-riskji. Hija tistipula wkoll li r-riskji għas-saħħa u s-sigurtà tal-ħaddiema fuq xogħol li jinvolvi aġenti kimiċi perikolużi għandhom jiġu eliminati jew jitnaqqsu għall-minimu possibbli permezz ta’:

• id-disinn u l-organizzazzjoni ta’ sistemi ta’ xogħol fuq il-post tax-xogħol,
• l-għoti ta’ tagħmir addattat għal xogħol li jinvolvi aġenti kimiċi u proċeduri ta’ manutenzjoni li jiżguraw is-saħħa u s-sigurtà tal-ħaddiema fuq il-post tax-xogħol, eċċ.

Id-Direttiva 2006/42/KE

dwar il-makkinarju, u d-Direttiva li temenda 95/16/KE, tgħid fil-preambolu tagħha li l-ispiża soċjali tan-numru kbir ta’ inċidenti kkawżati direttament mill-użu tal-makkinarju tista’ titnaqqas permezz tad-disinn u l-kostruzzjoni inerentement sikuri tal-makkinarju u permezz ta' installazzjoni u manutenzjoni.

L-ANNESS I dwar ir-rekwiżiti essenzjali tas-saħħa u s-sigurtà relatati mad-disinn u l-kostruzzjoni tal-makkinarju jinkludi l-prinċipji tal-integrazzjoni tas-sigurtà, rekwiżiti għal sistemi ta’ kontroll u dispożizzjonijiet speċifiċi dwar il-manutenzjoni tal-makkinarju, kif ukoll rekwiżiti għal informazzjoni, twissijiet u struzzjonijiet.

Ġew ippromulgati għadd ta’ Direttivi individwali li jikkontrollaw l-espożizzjoni tal-ħaddiema għal aġenti fiżiċi potenzjalment ta’ dannu fuq il-post tax-xogħol bħal vibrazzjoni, storbju, kampijiet elettromanjetiċi, radjazzjoni ottika u radjazzjoni jonizzanti. Dawn id-direttivi jinkludu dispożizzjoni mmirata biex tevita jew tnaqqas l-espożizzjoni, fost l-oħrajn, permezz ta’ programmi ta’ manutenzjoni xierqa għat-tagħmir tax-xogħol, il-post tax-xogħol u s-sistema tal-post tax-xogħol

• Id-Direttiva 2002/44/KE tal-Parlament Ewropew u tal-Kunsill dwar il-ħtiġijiet minimi tas-saħħa u s-sigurtà li jirrigwardjaw l-espożizzjoni tal-ħaddiema għar-riskji li jirriżultaw minn aġenti fiżiċi (vibrazzjoni)
  
  
• Id-Direttiva 2002/44/KE tal-Parlament Ewropew u tal-Kunsill dwar il-ħtiġijiet minimi tas-saħħa u s-sigurtà li jirrigwardjaw l-espożizzjoni tal-ħaddiema għar-riskji li jirriżultaw minn aġenti fiżiċi (storbju)
• Id-Direttiva 2006/25/KE tal-Parlament Ewropew u tal-Kunsill dwar il-ħtiġijiet minimi tas-saħħa u s-sigurtà li jirrigwardjaw l-espożizzjoni tal-ħaddiema għar-riskji li jirriżultaw minn aġenti fiżiċi (radjazzjoni ottika artifiċjali)
• Id-Direttiva 2004/40/KE tal-Parlament Ewropew u tal-Kunsill dwar il-ħtiġijiet minimi tas-saħħa u s-sigurtà li jirrigwardjaw l-espożizzjoni tal-ħaddiema għar-riskji li jirriżultaw minn mewġ u kampijiet elettromanjetiċi

Direttivi rilevanti oħrajn

• Id-Direttiva tal-Kunsill 92/58/KEE dwar il-ħtiġijiet minimi għall-provvista ta’ sinjali ta’ saħħa u/jew sigurtà fuq il-post tax-xogħol
• Id-Direttiva 1999/92/KE tal-Parlament Ewropew u tal-Kunsill dwar il-ħtiġijiet minimi għat-titjib tal-ħarsien tas-saħħa u s-sigurtà tal-ħaddiema potenzjalment f’riskju minn atmosferi splussivi
• Direttiva tal-Kunsill 83/477/KEE tad-19 ta’ Settembru 1983 dwar il-protezzjoni tal-ħaddiema mir-riskji relatati mal-espożizzjoni għall-asbestos fuq il-post tax-xogħol (it-tieni Direttiva individwali skont it-tifsira tal-Artikolu 8 tad-Direttiva 80/1107/KEE) kif emendata mid-Direttiva tal-Kunsill 91/382/KEE, mid-Direttiva tal-Kunsill 98/24/KE, mid-Direttiva 2003/18/KE u mid-Direttiva 2007/30/KE
• Id-Direttiva 2005/54/KE dwar il-protezzjoni tal-ħaddiema minn riskji relatati ma’ espożizzjoni għal aġenti bijoloġiċi fuq il-post tax-xogħol
• Id-Direttiva tal-Kunsill 92/57/KEE dwar l-implimentazzjoni ta’ ħtiġijiet minimi ta’ saħħa u sigurtà f’siti ta’ kostruzzjoni temporanji jew mobbli
• Id-Direttiva tal-Kunsill 96/82/KE dwar il-kontroll ta’ perikli ta’ inċidenti kbar li jinvolvu sustanzi perikolużi

Aktar informazzjoni tinsab fis-sezzjoni Leġiżlazzjoni Ewropea