X'inhuma inċentivi ekonomiċi

Inċentivi ekonomiċi huma vantaġġi finanzjarji mogħtija lill-kumpaniji jew lil organizzazzjonijiet li jtejjbu l-kundizzjonijiet tax-xogħol tagħhom. Dawn jinkludu:

• sussisdji tal-Istat, għotjiet u finanzjament
• ta' inċentivi bbażati fuq sistemi ta' taxxa jew strutturi ta' taxxa
• varjazzjoni fil-primjum tal-assigurazzjoni

:: Eżempji ta' inċentivi ekonomiċi

Kumpaniji li jtejbu l-kundizzjonijiet tax-xogħol tagħhom jistgħu jingħataw pagamenti finanzjarji jew aċċess favorevoli għal kundizzjonijiet finanzjarji (self mill-banek). Pereżempju, gvern jista' jisponsorja kumpaniji biex jinvestu f'makkinarju sigur jew f'organizzazzjoni tax-xogħol aktar sigura.

It-taxxi jistgħu jitfasslu biex iħeġġu lin-negozji jaġixxu b'ċertu mod. Pereżempju, jistgħu jiġu offruti waqfiet mit-taxxa lill-impjegaturi li jinvestu f'tagħmir li jkun aktar sigur mir-rekwiżiti legali minimi.

Il-primjum tal-assigurazzjoni mħallas minn kumpanija jista' jkun marbut mal-prestazzjoni tagħha fis-saħħa u s-sigurtà. Kumpaniji b'rati baxxi ta' inċidenti u mard, jew b'regoli tajbin dwar is-sigurtà, jistgħu jħallsu primjums aktar baxxi.

:: Evidenza xjentifika dwar inċentivi ekonomiċi

Ir-riċerka tindika li l-inċentivi ekonomiċi minn barra kumpanija jistgħu jtejbu s-saħħa u s-sigurtà fuq il-post tax-xogħol
.

Huwa pjuttost diffiċli li l-inċentivi jiġu evalwati xjentifikament, u għalhekk hemm bżonn ta' ħafna aktar xogħol biex tiġi pprovduta evidenza konkreta dwar il-benefiċċji tagħhom. Meta l-primjums tal-assigurazzjoni jkunu stabbiliti skont l-istorja tal-klejms tal-kumpanija’, il-klassifikazzjoni tal-esperjenza nstabet li kienet partikolarment effikaċi.

Iżda li wieħed jibbaża l-inċentivi ekonomiċi fuq rati ta' inċidenti tal-passat, din tista' tkun ħaġa riskjuża wkoll għaliex ir-rati ta' inċidenti f'kumpaniji individwali, b'mod partikolari dawk żgħar, jistgħu jkunu affettwati b'mod sinifikanti mill-varjazzjonijiet fl-istatistika. Għalhekk, dan it-tip ta' inċentiv jista' jippremja lil ditti traskurati iżda ffortunati, u jippenalizza lil dawk li jintlaqtu minn avvenimenti purament każwali.

Stħarriġ espert mill-Aġenzija Ewropea għas-Saħħa u s-Sigurtà fuq il-Post tax-Xogħol (EU-OSHA) fost l-Istati Membri sab li l-varjazzjonijiet fil-primjums tal-assigurazzjoni ġew evalwati mill-pajjiżi membri bħala l-aktar adatti (b'approvazzjoni ta' 71%), segwiti bil-promozzjoni tal-OSH (55%), it-tnaqqis tat-taxxa (49%) u l-premjijiet.

Fatturi ta' suċċess

Ġew identifikati l-fatturi tas-suċċess sewgenti:

1. Din l-iskema ta' inċentiv m'għandhiex tippremja biss ir-riżultati tal-passat fil-ġestjoni tajba tal-OHS, jiġifieri rati ta' inċidenti tal-passat, iżda għandha tippremja wkoll l-isforzi speċifiċi ta' prevenzjoni li għandhom l-għan li jnaqqsu l-inċidenti futuri u s-saħħa ħażina.
2. L-iskema ta' inċentiv għandha tkun miftuħa għad-daqsijiet kollha ta' intrapriżi u għandha tagħti attenzjoni partikolari għall-bżonnijiet tal-SMEs.
3. L-inċentiv għandu jkun għoli biżżejjed biex jimmotiva lill-impjegaturi biex jipparteċipaw.
4. Għandu jkun hemm relazzjoni ċara u fil-pront bejn l-azzjoni tal-prevenzjoni mixtieqa u l-premju.
5. Is-sistema ta' inċentiv għandu jkollha kriterji ċari dwar l-għoti u għandha tkun faċli kemm jista' jkun biex tintuża, biex il-piż amministrattiv jinżamm baxx għaż-żewġ intrapriżi u għall-organizzazzjonijiet li joffru l-inċentivi.
6. Jekk l-inċentiv jeħtieġ li jolqot numru kbir ta' intrapriżi, inċentivi ibbażati fuq l-assigurazzjoni jew fuq it-taxxa bi kriterji definiti b'mod preċiż huma l-aktar effikaċi (sistema magħluqa).
7. Jekk ix-xewqa hija li jiġu promossi soluzzjonijiet innovattivi għal oqsma speċifiċi, l-iskemi ta' sussidju huma l-aktar effikaċi (sistema miftuħa).

Studji tal-każijiet

L-istudji tal-każijiet fl-istħarriġ (ara r-rapport) juru li l-inċentivi ekonomiċi biex tiġi promossa l-OHS jaħdmu f'diversi ambjenti differenti. Pereżempju:

• Skema ta' inċentiv introdotta fis- settur tal-laħam Ġermaniż fl-2002 wasslet għal tnaqqis ta' 28% fl-inċidenti rappurtabbli matul is-sitt snin ta' wara meta mqabbel ma' tnaqqis ta' 16% fis-settur in ġenerali. F'numri totali dan ifisser li kien hemm madwar 1000 inċident inqas kull sena f'kumpaniji inċentivati

• Skema ta' inċentiv fis- settur agrikolu Finlandiż naqqset ir-rata ta' inċidenti b'10.2% , li s'issa ippreveniet aktar minn 5000 inċident.
• Kumpanija Ġermaniża għall-assigurazzjoni tas-saħħa introduċiet skema ta' inċentiv li immotivat grupp ta' kumpaniji klijenti biex jimplimentaw sistema moderna għall-ġestjoni tas-saħħa. Dan wassal għal tnaqqis ta' 7.6% fil-ħlas tal-mard u tnaqqis ta' 6.7% fl-assenteiżmu .
• Mill- kumpaniji Pollakki li introduċew sistema ta' ġestjoni tal-OHS, 70% kellhom inqas inċidenti u primjums tal-assigurazzjoni mnaqqasa, filwaqt li 50% irrappurtaw inqas ħaddiema f'kundizzjonijiet perikolużi.
• L- Awtorità Taljana għall-Kumpens tal-Ħaddiema tissussidja krediti bankarji biex tistimula l-investimenti fl-OHS fl-SMEs, li jirrapportaw 13-25% inqas inċidenti .
• Il- programm ta' sussidju Olandiż għall-investimenti f'makkinarju u tagħmir tajjeb għall-OHS wassal għal kundizzjonijiet tax-xogħol aħjar f'76% tal-intrapriżi
• Il- programm tal-patt Olandiż naqqas il-lif minħabba l-mard bi 28% fis-setturi parteċipanti meta mqabbla ma' 11% f'setturi oħrajn
  
  

Evalwazzjoni tal-analiżi dwar l-ispejjeż-benefiċċji

L- istudji tal-każijiet fir-rapport ġew analizzati f'aktar dettall u r-riżultati ġew ippubblikati f' analiżi xjentifika .

F'xi każijiet kien possibbli li ssir analiżi dettaljata tal-ispiża-benefiċċju ta' skema partikolari.

Fl- iskema tas-settur tal-laħam Ġermaniż il-kumpaniji parteċipanti kellhom il-primjums tagħhom imnaqqsa jekk jippromwovu s-sigurtà, eż. permezz tax-xiri ta' skieken tas-sigurtà jew taħriġ dwar is-sigurtà tas-sewwieq.

Dan wassal għal madwar 1000 inċident rappurtabbli inqas (jiġifieri dawk li jirriżultaw f'aktar minn 3 ijiem ta' nuqqas mix-xogħol) kull sena sa mill-introduzzjoni tagħha fl-2002.

Għall-ewwel sitt snin (2002-2007) l-iskema swiet € 8.32 miljun għall-255,000 ħaddiem fis-settur. Madankollu, il- benefiċċju dovut għal rati inqas ta' inċidenti kien ikkalkulat li jlaħħaq € 40.02 miljun . Dan ifisser li ġew iffrankati € 4.81 għal kull € 1 investit fl-iskema tal-inċentiv.

Madwar € 303 milljuni ġew investiti fil-programm ta' patt Olandiż , li minnhom, 55% tħallsu mill-industrija tas-settruri parteċipanti u l-kumplament mill-Ministeru tal-Affarijiet Soċjali. Is-sistema ta' kofinanzjaemt stimulat lis-setturi biex jonfqu aktar fondi fuq it-titjib tal-kundizzjonijiet tax-xogħol. Il-valur ta' aktar tnaqqis fil-lif minħabba mard, ikkalkulat permezz ta' valur miżjud għal kull sena maħduma, jammonta għal € 2.7 biljuni.

Madankollu, mhux it-€2.7 biljuni kollha għandhom ikunu attribwiti għall-programm tal-patt, billi l-lif minħabba l-mard jista' jkun influwenzat minn ħafna fatturi, eż. il-livelli ta' motivazzjoni, jew ir-rata ta' qgħad f'ċertu settur. L-esperti jaħsbu li jkun raġjonevoli li jorbtu terz tat-tnaqqis għall-programm ta' patt. Dan xorta jipproduċi benefiċċju ta'€ 900 miljun, jew li jiġu ffrankati € 3 għal kull € 1 li jintnefaq.

Ħarsa ġenerali lejn il-politika

Ħafna pajjiżi Ewropej għandhom sistema ta' sigurtà soċjali 'Bismarckian' fejn l-istituzzjonijiet tal-assigurazzjoni tal-inċidenti huma organizzati f'monopolju immexxi mill-Istat. Stati Membri oħra għandhom suq kompetittiv f'sistema 'Beveridgean' , u xi pajjiżi għandhom taħlita ta' dawn iż-żewġ sistemi.

L-approċċi tal-ikklassifikar tal-esperjenza jistgħu jinstabu kemm fis-swieq kompetittivi kif ukoll f'dawk monopolistiċi . Madankollu, hemm differenzi fir-rigward tal-isforzi ta' prevenzjoni orjentati lejn il-futur, bħal pereżempju t-taħriġ jew l-investimenti fl-OHS.
Dan m'għandux ikun problema għal approċċi monopolistiċi , minħabba li l-kumpanija tal-assigurazzjoni tista' tkun żgura li tkun sejra tibbenefika mill-effett pożittiv li l-investimenti jkollhom fuq ir-rati tal-klejms. Madankollu, f' suq kompetittiv , il-kumpanija tal-assigurazzjoni għandha r-riskju li l-kumpaniji jistgħu jbiddlu l-assiguraturi b'avviż fuq perjodu ta' żmien qasir sabiex l-investimenti fl-isforzi ta' prevenzjoni jkunu ta' benefiċċju għall-kompetituri tagħha. Soluzzjoni possibbli għas-swieq kompetittivi tista' tkun l-introduzzjoni ta' kuntratti b'terminu twil li jdumu diversi snin jew il-ħolqien ta' fond komuni għall-prevenzjoni li jkun iffinanzjat b'mod ugwali mill-assiguraturi kollha.

• Il-Ġermanja, Franza, l-Italja u l-Polonja kollha joffru inċentivi varji permezz tas-sistema tagħhom ta' assigurazzjoni pubblika. Dawn ma jinkludux biss il-varjazzjonijiet fil-primjum tal-assigurazzjoni, iżda wkoll programmi ta' sussidju għal investimenti speċifiċi fl-OHS.
• Fi Spanja l-inċentivi tal-assigurazzjoni huma ippjanati fl-istrateġija nazzjonali tal-OHS u huwa offruti varjetà ta' programmi ta' sussidji fuq livell nazzjonali kif ukoll reġjonali.
• Mill-Istati Membri ż-żgħar il-Belġju, il-Finlandja, u l-Olanda huma l-aktar attivi, u juru li l-inċentivi ekonomiċi huma wkoll possibbli f'sistemi ta' assigurazzjoni privati għall-inċidenti.

Il-fatturi li jinfluwenzaw it-trasferabilità tal-iskemi ta' inċentivi huma diskussi f'aktar dettall fil- pubblikazzjoni xjentifika segwenti .

Impatt tal-proġett tal-EU-OSHA dwar l-Inċentivi Ekonomiċi

Dan il-proġett kien ispirat mill- Istrateġija Ewropea għall-OHS 2007-2012 , li kellha l-mira li tnaqqas l-inċidenti fuq il-post tax-xogħol b'25%. Il-proġett huwa mogħti pariri minn grupp espert ta' organizzazzjonijiet li nħatru mill-Istati Membri tal-UE. Dan jinkludi għadd ta' proġetti speċifiċi li twettqu miċ-Ċentru Topiku tal-EU-OSHA (konsorzju ta' Istituti tar-riċerka Ewropej).

Il-proġett fuq perjodu ta' żmien twil beda fl-2008 u sejjer jibqa' għaddej sal-2013.

Fl- ewwel fażi tiegħu (2008-2010) twettqu diversi prodotti:

• rapport komprensiv intitolat Inċentivi ekonomiċi biex jitjiebu s-saħħa u s-sigurtà fuq il-post tax-xogħol: Reviżjoni mill-perspettiva Ewropea ,
• folja ta' fatti (li tagħti r-rapport fil-qosor)
• żewġ artikli fil-Ġurnal Skandinavu għax-Xogħol, l-Ambjent & Saħħa (SJWEH)
• serje ta' workshops tal-grupp espert li fit-taqsima tal-avvenimenti tagħna iddokumentaw
• ġabra ta' studji ta' każijiet li jistgħu jinstabu fid-database tagħna dwar il-prattika tajba

Il- grupp espert tal-Aġenzija dwar l-inċentivi ekonomiċi ma jagħtix biss parir u kontribut fl-attivitajiet tal-Aġenzija relatati mal-inċentivi ekonomiċi, iżda jgħin ukoll biex jippromwovi l-prodotti fost il-partijiet interessati. Il-proġett u r-riżultati tiegħu ġew ippreżentati waqt konferenzi u workshops f'numru ta' pajjiżi Ewropej , bħal pereżempju l-Bulgarija, Ċipru, ir-Repubblika Ċeka, il-Ġermanja, l-Italja, l-Iżvezja, is-Slovenja, u r-Renju Unit.