Perikli u riskji għas-sewwieqa tat-trasport bit-triq

Rapport mill-Osservatorju tar-Riskji tal-UE-OSHA, li jkopri s-settur tat-trasport kollu, jenfasizza l-perikli, ir-riskji u l-kwistjonijiet tal-OSH li ġejjin għas-settur tat-trasport bit-triq:

• Il-perikli u r-riskji fiżiċi ewlenin jinkludu: espożizzjoni għal vibrazzjonijiet u ħinijiet bil-qiegħda fit-tul (disinn tas-siġġu, il-kabina u apparat ieħor); immaniġġjar manwali; espożizzjoni għall-ħsejjes – waqt it-tagħbija u l-ħatt, meta jinstaqu trakkijiet (muturi, roti, ventilaturi, eċċ.); teħid man-nifs ta' fwar u dħaħen, immaniġġjar ta' sustanzi perikolużi (dħaħen tal-egżost, kimiċi abbord, fjuwil, espożizzjoni għat-trab tat-triq waqt it-tagħbija, il-ħatt u f'waqfiet ta' serħan, il-ħasil u l-preparazzjoni tal-vettura); kundizzjonijiet klimatiċi (sħana, kesħa, nixfa, xita eċċ); skop limitat biex jiġu adottati kundizzjonijiet ta' xogħol ergonomiċi u stili ta' ħajja li jġibu 'l quddiem is-saħħa.

• L-għeja hi l-aktar problema ta' saħħa li tiġi rrapportata b'mod komuni fit-trasport tal-art skont l-istħarriġ ta' Eurofound’ dwar il-kundizzjonijiet tax-xogħol Ewropej u servejs nazzjonali. Is-settur tat-trasport bit-triq huwa kompetittiv ħafna. Il-piżijiet tax-xogħol qegħdin jiżdiedu u s-sewwieqa jiffaċċjaw pressjonijiet ikbar, pereżempju pressjonijiet minn klijenti biex iwasslu aktar malajr u prezz irħas, bi kwistjonijiet bħal pereżempju ‘ġestjoni eżatt fil-ħin’, żieda fit-traffiku, monitoraġġ remot, u ħafna ħaddiema li qed jaħdmu sigħat twal u irregolari.

• Il-vjolenza u l-fastidju qed jiżdiedu fit-trasport, iżda l-biċċa l-kbira ma jiġux irrapportati. Ħafna drabi l-ħaddiema tat-trasport iridu jagħmluha ta' intermedji involontarji għal bidliet fl-organizzazzjoni li jaffettwaw is-servizz għall-konsumatur. Hemm ukoll nuqqas ta' proċeduri ta' rappurtaġġ, miżuri ta' prevenzjoni u rutini ta' segwitu.

• Il-forza tax-xogħol tat-trasport qiegħda tixjiħb'rata ikbar mill-popolazzjoni tax-xogħol ġenerali u jista' jkun hemm nuqqas fil-forniment tax-xogħol.

• Bidliet fil-kontenut tax-xogħol jinkludu: użu dejjem jikber ta' teknoloġija ġdida – bħal pereżempju għodod għall-ippjanar remot u l-monitoraġġ, kompjuters abbord għar-rappurtaġġ u l-irrekordjar tat-twassil tal-oġġetti; il-bżonn għal għarfien tal-kodiċi tat-triq u l-lingwi tal-UE. Minn naħa l-oħra, ix-xogħol huwa aktar monotonu b'inqas opportunitajiet għat-tagħlim meta mqabbel ma' dak tal-popolazzjoni medja li taħdem.

Aktar informazzjoni fir-rapport
OHS f'ċifri: Occupational safety and health in the transport sector — an overview (bl-Ingliż biss)

Introduzzjoni għall-ġestjoni tar-riskji għas-sewwieqa tat-trasport bit-triq

Riskji relatati max-xogħol fit-trasport bit-triq

It-trasport bit-triq huwa wieħed mill-aktar setturi perikolużi fl-UE. Statistiċi tal-aċċidenti mid-database CARE tal-Ewropa’ juru li madwar l-Ewropa jinqatlu madwar 10,000 persuna fis-sena fit-toroq. Dawn iċ-ċifri jinkludu medja ta' 1,300 sewwieq tax-xarabank, kowċis, vetturi u trakkijiet ta' ġarr ta' oġġetti tqal (jiġifieri vetturi taħt it-3.5 tunnellata).

Is-sewwieqa mhux biss jiffaċċjaw ir-riskju ta' aċċidenti fit-triq. Dawn jistgħu jiżviluppaw dahar ħażin minn perjodi twal bilqiegħda f'kabini mhux komdi. Dawn jistgħu jweġġgħu minħabba waqgħat mill-għoli, waqt li jkunu qed jimmaniġġjaw tagħbijiet jew waqt li jkunu qed iqabbdu jew iħollu l-karrijiet. Dawn jiffaċċjaw kundizzjonijiet ambjentali avversi u perikli fiżiċi bħal pereżempju l-istorbju, il-vibrazzjonijiet u temperaturi baxxi u sustanzi perikolużi.

Barra dan,il-pressjoni tal-ħin tista' tirriżulta fi stress minħabba x-xogħol, vizzji ħżiena tal-ikel, nuqqas ta' rqad, perjodi ta' waqfien mhux adegwati u mistrieħ mhux biżżejjed bejn ix-xiftijiet. Sigħat twal ta' xogħol, is-solitudni u s-separazzjoni minn mal-familja u l-ħbieb huma wkoll karatteristiċi tipiċi tas-settur tat-trasport bit-triq.

L-approċċ tal-ġestjoni tas-saħħa u s-sigurtà fuq il-post tax-xogħol

L-impjegaturi ma jistgħux jeżerċitaw l-istess kontroll fuq il-perikli għall-impjegati waqt is-sewqan jew waqt li jkunu rekbin fuq ix-xogħol bħal ma jagħmlu fuq il-post tax-xogħol. Iżda ħafna inċidenti fit-triq jistgħu jiġu evitati billi sempliċement jeżaminaw x'jiġri eżatt f'negozju, imbagħad jidentifikaw ir-riskji preżenti u jieħdu passi prattiċi biex jassiguraw li hemm miżuri fis-seħħ biex jiġu eliminati jew imnaqqsa r-riskji.

L-approċċ Ewropew għas-saħħa u s-sigurtà fuq il-post tax-xogħol jinkludi l-valutazzjoni tar-riskji u l-implimentazzjoni ta' miżuri preventivi, filwaqt li jagħti prijorità lit-tneħħija tar-riskji fis-sors. Dawn il-prinċipji għandhom jiġu applikati biex jiġi implimentat pjan preventiv għas-saħħa u s-sigurtà fit-triq li jinkludi l-vetturi u l-apparat tagħhom, l-ippjanar tal-operazzjonijiet u l-persunal. L-organizzazzjonijiet għandhom jistabbilixxu reġistru biex fih idaħħlu kwalunkwe inċident. Dawn jistgħu jiġu analizzati bħala parti mill-valutazzjoni tar-riskji biex jgħinu biex tiġi stabbilita l-aħjar azzjoni li trid tittieħed. Il-miżuri biex jiġi mmaniġġjat ir-riskju għandhom ikunu parti mill-maniġment globali tan-negozju, mhux xi ħaġa separata.

Minħabba li s-sewwieqa jistgħu jkunu ta' ħafna esperjenza kif ukoll ħaddiema li jaħdmu għal rashom, huwa importanti ħafna li jiġu involuti fl-identifikazzjoni tal-perikli u li jiġu stabbiliti l-aħjar modi ta' kif jiġu ġestiti r-riskji.

Kwistjonijiet ta' saħħa u sigurtà fuq il-post tax-xogħol li għandhom jiġu koperti fi pjan amministrattiv

Aktar informazzjoni:
- Taqsima tal-valutazzjoni tar-riskji

Leġiżlazzjoni relevanti għas-sigurtà fit-trasport bit-triq

• Responsabbiltajiet’ ta' min iħaddem

• Direttivi tal-OHS

• Direttivi u regolamenti għat-traffiku fit-triq

Responsabbiltajiet’ ta' min iħaddem

Kull minn juża l-awtostrada pubblika jrid jikkonforma mal-leġiżlazzjoni dwar it-traffiku tat-triq. Din tkopri aspetti diversi bħar-rekwiżiti għall-vetturi biex ikunu konformi mar-regoli dwar l-adegwatezza għat-triq permezz tal-applikazzjoni tal-limiti tal-veloċità. Iżda l-ġestjoni tar-riskji għall-impjegati li jsuqu bħala parti minn xogħolhom jeħtieġ aktar minn sempliċi konformità mal-leġiżlazzjoni dwar it-traffiku fit-triq.

Id-Direttivi Ewropej dwar is-saħħa u s-sigurtà fuq il-post tax-xogħol jirrikjedu li l-impjegaturi jieħdu passi xierqa biex jassiguraw is-saħħa u s-sigurtà tal-impjegati tagħhom. Dan jinkludi l-ħin ta' meta jkunu qed isuqu, jew jirkbu fuq ix-xogħol, kemm jekk dan isir f'karozza tal-kumpanija jew mikrija, jew fil-vettura tal-impjegat’ innifsu.

Dejjem se jkun hemm riskji assoċjati mas-sewqan. Għalkemm dawn ma jistgħux jiġu kkontrollati għal kollox, impjegatur għandu r-responsabbiltà li jieħu l-passi raġonevoli kollha biex jiġġestixxi dawn ir-riskji għal livell baxx kemm jista' jkun bl-istess mod li jagħmlu fuq il-post tax-xogħol.

Direttivi dwar is-saħħa u s-sigurtà fuq il-post tax-xogħol

Il-ħaddiema, inkluż dawk fis-settur tat-trasport bit-triq, huma protetti bid-direttivi Ewropej dwar is-saħħa u s-sigurtà fuq il-post tax-xogħol, li huma implimentati fil-leġiżlazzjoni tal-Istat Membru. Id-Direttiva 89/391/UE (direttiva ta' qafas) tistabbilixxi l-prinċipji bażiċi għall-prevenzjoni tar-riskju. Din titlob li l-impjegaturi jagħmlu valutazzjonijiet tar-riskju u timponi wkoll dover ġenerali fuqhom biex jassiguraw is-saħħa u s-sigurtà tal-impjegati tagħhom fuq il-post tax-xogħol.

Id-direttiva ta' qafas hija ssupplimentata wkoll b'direttivi individwali. Dawk relevanti għat-trasport bit-triq jinkludu:

• l-immaniġġjar manwali tat-tagħbijiet
• riskji li jirriżultaw minn aġenti fiżiċi (vibrazzjoni)
• riskji li jirriżultaw minn aġenti fiżiċi (ħoss)
• il-ħin tax-xogħol tal-persuni li jagħmlu attivitajiet mobbli ta' trasport bit-triq
• il-protezzjoni taż-żgħażagħ fuq ix-xogħol
• sustanzi perikolużi

Direttivi u regolamenti għat-traffiku fit-triq

Is-settur tat-trasport bit-triq huwa kopert ukoll b'diversi direttivi u regolamenti dwar is-sewqan u t-trasport bit-triq inkluż:

• regolament dwar il-ħinijiet tas-sewqan, il-brejks u l-perjodi ta' serħan għal sewwieqa ingaġġati fil-ġarr ta' oġġetti u passiġġiera bit-triq
• direttivi relatati mat-trasport ta' oġġetti perikolużi bit-triq
• direttiva li tistabbilixxi d-dimensjonijiet massimi awtorizzati fit-traffiku nazzjonali u internazzjonali u l-piżijiet massimi awtorizzati fit-traffiku internazzjonali għal ċerti vetturi li jiċċirkolaw fi ħdan il-Komunità
• direttiva dwar il-liċenzji tas-sewqan.

Aktar informazzjoni dwar id-Direttivi u r-Regolamenti Ewropej dwar it-traffiku tat-triq

Sewwieqa tat-taxi - riskji okkupazzjonali

Rapport tal-UE-OSHA dwar il-gwida ta' prattika tajba għas-sewwieqa tat-taxi jenfasizza numru ta' riskji għas-sewwieqa tat-taxi. Ir-rapport tal-OHS f'ċifri tal-Osservatorju tar-riskji tal-UE-OSHA jidentifika xi kwistjonijiet ewlenin għal dan il-grupp ta' ħaddiema.

Is-sewwieqa u x-xufiera tat-taxi jinkludu: sewwieqa tat-taxi liċenzjati, ‘minicabs’ mhux regolati; sewwieqa tal-limousine; u xufiera tal-kumpaniji. Minħabba l-ħtiġijiet tax-xogħol, is-sewwieqa tat-taxi jistgħu jesponu lilhom infushom għal riskji ta' sewqan mhux neċessarji. Ir-riskji għas-sewwieqa tat-taxi jinkludu:

Riskji fiżiċi

• Vibrazzjonijiet: Is-sewwieqa huma esposti għall-vibrazzjonijiet prodotti mill-vettura tagħhom. Dawn il-vibrazzjonijiet huma ftit jew wisq ta' ħsara jiddependi mit-tip ta' vettura, il-veloċità medja u kemm jitqattgħu sigħat ta' sewqan.
• Immaniġġjar manwali tat-tagħbijiet bit-tqandil, iż-żamma, it-tniżżil, l-imbuttar, il-ġbid, il-ġarr: is-sewwieqa tat-taxi jagħmlu immaniġġjar manwali tat-tagħbijiet, eż. meta jerfgħu jew iżommu bagalji, meta jimbuttaw siġġu bir-roti jew meta jgħinu persuni b'diżabilità.
• Riskji marbuta ma' ħin twil bil-qiegħda, inkluż MSDs tal-għonq, l-ispalla u d-dahar, u mard kardjovaskulari.
• Riskji marbuta mal-fatt ‘li jkunu fit-triq’.

Riskji kimiċi u bijoloġiċi

Sewwieqa professjonali, b'mod partikolari dawk li jaħdmu fil-belt, huma esposti għal dħaħen tal-egżost u pollutanti oħra.

Riskji psikosoċjali, inkluż l-istress u l-vjolenza

• Ir-riskji tal-istress jinkludu: xogħol ripetuttiv u monotonu li jeħtieġ livell għoli ta' konċentrazzjoni; ftit opportunitajiet ta' teħid ta' deċiżjonijiet u appoġġ soċjali dgħajjef (impjieg iżolat b'kuntatt limitat mal-kollegi); l-organizzazzjoni tax-xogħol: sigħat tax-xogħol mhux soċjali, xiftijiet twal, eċċ; riskju għoli ta' għeja, pereżempju, is-sewwieqa jistgħu jaħdmu xiftijiet ta' 10 sa 12-il siegħa u xogħol bil-lejl u skedi irregolari jistgħu pereżempju jikkawżaw problemi ta' rqad.
• Vjolenza: Is-sewwieqa tat-taxi huma aktar esposti għall-vjolenza u aggressjoni mill-ħaddiem medju. Dawn jaħdmu waħedhom u bil-lejl, ikollhom flus kontanti fil-karozzi u jistgħu jsuqu minn ġo żoni iżolati u perikolużi. Il-klijenti tagħhom jistgħu jkunu xorbu ammonti eċċessivi ta' alkoħol jew ikunu ħadu d-drogi.

Riskji relatati mal-imġiba individwali

• Tipjip
• Konsum ta' stimulanti, bħal pereżempju kafè u alkoħol
• Nuqqas ta' eżerċizzju fiżiku - is-sewwieqa u x-xufiera tat-taxi għandhom impjieg sedentarju;
• Rata baxxa ta' użu taċ-ċinturin tas-sikurezza fost is-sewwieqa tat-taxi u l-passiġġiera tagħhom.

Aktar informazzjoni fir-rapporti:

- Taxi drivers’ safety and health: A European Review of good practice guidelines (bl-Ingliż biss)

- OSH f'ċifri: Occupational safety and health in the transport sector — an overview (bl-Ingliż biss)

Tqassim bir-rota u bil-mutur - riskji okkupazzjonali għar-rikkieba

Rapport tal-UE-OSHA dwar il-gwida għal prattika tajba għar-rikkieba tar-roti u l-muturi għat-tqassim jenfasizza numru ta' riskji għar-rikkieba. Ir-rapport OHS f'ċifri tal-Osservatorju tar-riskji tal-UE-OSHA jidentifika xi kwistjonijiet ewlenin għal dan il-grupp ta' ħaddiema.

Il-ħaddiema tat-tqassim jinkludu messaġġiera, kurriera u sewwieqa li jġorru l-ikel li jużaw ir-roti jew il-muturi u l-użu ta' rikkieba tar-roti u l-muturi jista' jkun mod effiċjenti ta' kif isiru l-kunsinni. Iżda r-rikkieba tal-muturi u r-roti huma wkoll tnejn mill-aktar gruppi vulnerabbli ta' utenti tat-triq. Ir-rikkieba fiż-żewġ setturi jsofru minn pressjoni ta' ħin: ġeneralment, il-ħaddiema tal-kunsinna huma mħallsa għal kull kunsinna u huma meħtieġa jeżegwixxu l-kompiti f'perjodu ta' ħin qasir ħafna. Sewwieqa li jġorru l-ikel iridu jwasslu l-ikel waqt li jkun għadu jaħraq.

Tqassim bil-mutur

Rikkieba li jqassmu l-fast food jaħdmu l-iktar bil-lejl, mit-8 pm sas-1 am. Dawn jistgħu jiġu kkonfrontati minn klijenti aggressivi jew xurbana. Dawn jaħdmu waħedhom u fid-dlam, li jagħmel l-impjieg tagħhom perikoluż. Rikkieba li jqassmu l-ikel huma wkoll f'riskju ta' serq minħabba li jżommu l-flus.

Il-fatt li jsuqu mutur fi kwalunkwe temp u f'kundizzjonijiet avversi fit-toroq, dejjem mgħaġġlin biex ilestu l-kompitu fil-ħin, iżid ir-riskju ta' aċċident. Normalment, it-tqassim tal-ikel isir minn ħaddiema żgħażagħ jew minn ħaddiema li ma kellhom l-ebda taħriġ fix-xogħol. Dawn jaħdmu l-aktar part-time u fuq bażi ta' kuntratt. Jista' jkun li dawn ikollhom nuqqas ta' taħriġ u esperjenza kif isuqu l-vettura tagħhom.

Riskji u perikli għall-messaġġiera bil-muturi jinkludu:

Kurriera bir-rota

Il-kurriera jaħdmu b'mod predominanti bħala kuntratturi indipendenti. Dawn jaħdmu bħala subkuntratturi għal kumpanija ta' kurriera waħda jew aktar. Il-kurriera jqattgħu l-ġurnata kollha barra jaħdmu u jistgħu jkunu fit-triq għal massimu ta' 9 sigħat. Dawn huma esposti għal diversi riskji u għal kundizzjonijiet ta' temp avversi u anki estremi.

Minħabba d-distanza koperta mill-kurriera u l-ammont ta' ħin li jqattgħu fit-triq, dawn huma aktar fiċ-ċans li jkollhom aċċidenti minn ċiklisti oħra. Il-messaġġiera jkunu barra fl-iktar ħin perikoluż tal-ġurnata, meta l-kwalità tal-arja tkun l-agħar. Barra dan, l-isforz fiżiku taċ-ċikliżmu jeħtieġ rata ta' nifs ogħla u iktar intensa.

Il-fatturi ta' riskju għall-kurriera bir-roti huma relatati man-natura tal-impjieg tagħhom u l-ambjent tat-traffiku: l-età tagħhom (fuq medja madwar 25 sena), is-sess (l-aktar irġiel), l-istat tal-impjieg (kuntratturi indipendenti, imħallsin mat-tqassim jew fuq bażi ta' kummissjoni u jaħdmu full-time fit-triq), l-iskop tax-xogħol tagħhom (tqassim mgħaġġel), iż-żona li joperaw fiha (settur tan-negozju bi traffiku qawwi ta' karozzi u ħafna nies bil-mixi, eċċ).

Riskji u perikli għall-messaġġiera bir-rota jinkludu:

Aktar informazzjoni fir-rapporti:

- Delivery and despatch riders safety and health: A European Review of good practice guidelines (bl-Ingliż biss)

- OHS f'ċifri: Occupational safety and health in the transport sector — an overview (bl-Ingliż biss)

Xi sejbiet dwar is-saħħa u s-sigurtà fuq il-post tax-xogħol fis-settur tat-trasport bit-triq

Ftit konklużjonijiet mill-osservatorju tar-riskji tal-UE-OSHA

Rapport tal-osservatorju tar-riskji tal-UE-OSHA, li jkopri s-settur tat-trasport kollu, sab li x-xogħol fit-trasport jirrikjedi livelli għoljin ta' ħila u kompetenza professjonali, inkluż: sewqan; tagħbija / ħatt; tiswijiet u s-soluzzjoni ta' problemi tekniċi; l-użu ta' teknoloġija avvanzata; ċerti ħiliet lingwistiċi; amministrazzjoni bażika; ‘ambaxxatur tal-kumpanija’ fit-triq u l-komunikazzjoni mal-klijenti u mal-konsumaturi. Dan jenfasizza l-importanza għas-settur li jinvesti f'sewwieqa u fil-kundizzjonijiet tax-xogħol tagħhom.

B'mod aktar speċifiku, il-konklużjonijiet mir-rapport jenfasizzaw il-ħtieġa:

• għal aktar tqajjim ta' għarfien, b'mod speċjali rigward xi perikli li ħafna drabi huma injorati, bħal pereżempju s-sustanzi perikolużi;
• li l-OSH tiġi implimentata fil-prevenzjoni tal-aċċidenti fit-trasport, il-bażi fuq l-esperjenzi u l-għarfien minn miżuri ta' sigurtà fit-triq; li jitqajjem l-għarfien fuq kwistjonijiet ta' OSH f'oqsma tal-politika li jista' jkollhom impatt fuq is-saħħa u s-sigurtà tal-ħaddiema tat-trasport;
• li tiġi promossa l-kooperazzjoni bejn il-partijiet interessati fit-trasport u l-partijiet interessati fl-OSH;
• li eżempji effettivi jittieħdu bħala l-bażi.

Aktar informazzjoni fir-rapporti: OHH f'ċifri – L-OHS fis-settur tat-trasport – ħarsa ġenerali.

Xi sejbiet dwar il-prevenzjoni tar-riskji mill-istudji ta' każijiet ta' prattika tajba

L-UE-OSHA ġabret numru ta' studji ta' każijiet fil-ġestjoni tar-riskji għas-sewwieqa tat-trasport bit-triq u kampanji biex titjieb is-sikurezza. Konklużjonijiet li jistgħu jittieħdu mill-każijiet jinkludu s-segwenti:

Is-sewwieqa ħafna drabi jkunu jaħdmu għal rashom, b’ħafna esperjenza u mdorrija jaħdmu b’mod indipendenti.. Dan jissuġġerixxi, fost affarijiet oħra:

• L-iżgurar li l-approċċi jkunu prattiċi u mhux patronizzanti.
• L-użu ta’ postijiet iffrekwentati mis-sewwieqa – żoni ta’ waqfien eċċ.
• L-iżgurar li l-parir u s-soluzzjonijiet ikunu bbażati fuq l-esperjenza tas-sewwieqa’ pereżempju billi:

- Jinvolvu lis-sewwieqa fil-valutazzjoni tar-riskji u fl-iżvilupp tas-soluzzjonijiet

- Jużaw lis-sewwieqa bħala difensuri, mentors eċċ. Jippermettu żmien biżżejjed għall-iżvilupp tas-soluzzjonijiet u għall-introduzzjoni tal-bidla

Il-konsumaturi, il-klijenti u l-partijiet interessati għandhom ikunu involuti fis-soluzzjonijiet ta’ ġestjoni tar-riskji:

• Il-katina tal-forniment – fornituri, fejn isir it-tqassim, eċċ.
• Il-passiġġieri, tfal tal-iskola
• Il-gruppi tas-sigurtà fit-triq, il-ministeri għat-trasport, eċċ.

L-organizzazzjonijiet kbar huma f’pożizzjoni li jistabbilixxu standards tal-OHS għall-kuntratturi tat-tqassim tagħhom. Dan minnu nnifsu jista’ jistimula lil dawn l-SMEs biex jadottaw l-istess standards mal-klijenti l-oħrajn tagħhom.

Meta t-teknoloġija l-ġdida tkun introdotta fil-kabini, din tkun tista’ tintuża għal għanijiet tal-OHS, pereżempju biex iżżomm lis-sewwieqa infurmati u ttejjeb l-iskedar tat-tqassim.

Is-soluzzjonijiet tal-OHS jistgħu jfissru li jkun meħtieġ iktar żmien biex jitwettaq ix-xogħol. Dan irid jitqies fl-organizzazzjoni tax-xogħol u fl-iskedar tax-xogħol. Il-klijenti jeħtieġu wkoll li jkunu konxji minn dan.

Taħriġ, eż. it-tekniki ta’ sewqan difensiv, għandu jkun parti minn sistema organizzativa li tipprevjeni r-riskji u li jkollha impenn amministrattiv ċar.

Aktar informazzjoni:

• Skeda informattiva 97 - Delivering the message Campaigning on OSH in the road transport sector
• Rapport - Delivering the message Programmes, initiatives and opportunities to reach drivers and SMEs in the road transport sector (bl-Ingliż biss)
• Skeda informattiva 98 - Managing risks to drivers in road transport: każijiet ta' prattika tajba
• Rapport - Managing risks to drivers in road transport (bl-Ingliż biss)